Komando birliklərimiz qısa müddətdə Qarabağdakı qeyri-qanuni silahlıları təmizləmək iqtidarındadır – Ekspert
Bakı, 25 iyul, AZƏRTAC
Prezident İlham Əliyevin sədrliyi ilə 2023-cü ilin altı ayının sosial-iqtisadi yekunlarına həsr olunmuş müşavirədə dövlətimizin başçısı İkinci Qarabağ müharibəsindən sonra Silahlı Qüvvələrimizdə aparılan struktur islahatların davam etdiyini vurğulayaraq deyib: “Biz öz Silahlı Qüvvələrimizi ən qabaqcıl orduların səviyyəsinə çatdırmalıyıq, yəni, təbii ki, Azərbaycan miqyasını nəzərə almaq şərti ilə. Struktur islahatları, idarəetmə və özünü müdafiəetmə qabiliyyəti nöqteyi-nəzərindən biz elə güc yaradırıq ki, yerləşdiyimiz coğrafiyada özümüzü tam əmin hiss edə bilək. Bu gün də belədir, amma daha böyük işlər də görülməlidir”.
Səslənən fikirlər ondan ibarətdir ki, Silahlı Qüvvələrimizin modernləşdirilməsi istiqamətində işlər sürətlə aparılır. Amma bu gün Azərbaycan Ordusunun müəyyən istiqamətdə silahlara və yenilənməyə daha çox ehtiyacı var. Azərbaycan keçmiş SSRİ dağıldıqdan sonra həmin dövrdən qalmış ordusunu Ermənistan və ona havadarlıq edənlərlə müharibə apararaq yaratdı. Artıq 1990-cı illərin əvvəllərində gördüyümüz ordudan əsər-əlamət qalmayıb. Həm silah-sursat, həm də yeni ştat strukturu ilə fəaliyyəti baxımından Ordumuz güclənir. Xüsusi vurğulamaq istəyirəm ki, Türkiyə Prezidenti Rəcəb Tayyib Ərdoğanın prezident seçkilərindən sonra Bakıya etdiyi səfəri zamanı Azərbaycan Prezidenti ilə keçirdiyi görüşdə dövlətimizin başçısı belə fikir səsləndirdi ki, Silahlı Qüvvələrimiz qardaş Türkiyə Ordusunun modeli üzrə hazırlanır.
Bu fikirləri AZƏRTAC-a açıqlamasında hərbi jurnalist, ekspert, ehtiyatda olan polkovnik Üzeyir Cəfərov söyləyib.
Hərbi ekspert diqqətə çatdırıb ki, bundan əvvəl qardaş Türkiyənin milli müdafiə naziri Hulusi Akar, həm də hazırkı müdafiə naziri Yaşar Gülər 2025-ci ilə qədər Azərbaycan Silahlı Qüvvələrinin Türkiyə Ordusu standartlarına tam şəkildə uyğunlaşdırılacağını qeyd ediblər. Beləliklə, həmin ordunun silahları də modern və yeni olmalıdır. “Biz tanklarımızı, piyadaların döyüş maşınlarını da yaxın dövrdə ən yeniləri ilə əvəzləməyi planlaşdırırıq. Çünki bu gün ən müasir silah-sursatlar dünyada bir çox məsələləri həll edir. Elə 44 günlük İkinci Qarabağ müharibəsində qardaş Türkiyədən, o cümlədən strateji müttəfiqimiz olan İsraildən aldığımız pilotsuz uçuş aparatlarından, Azərbaycanın digər ölkələrlə Müdafiə Sənayesi Nazirliyi xətti ilə birgə istehsalı olan silah-sursatlardan, XXI əsrin tələblərinə cavab verən avadanlıqlardan istifadə olundu. Ona görə biz yeni silahları almağa davam edirik. Müdafiə Nazirliyi, Dövlət Sərhəd Xidməti, Daxili Qoşunlar, Fövqəladə Hallar Nazirliyi, Dövlət Təhlükəsizliyi Xidmətinin, Dəniz Qüvvələrimizin xüsusi təyinatlıları müasir silah-sursatlar, rabitə avadanlıqları və cihazları ilə təchiz olunub. Bir sözlə, yəqin ki, 2023-cü ilin sonunadək alınacaq yeni silah-sursatlarla ordumuzun döyüş qabiliyyəti bir qədər də artacaq”.
Azərbaycan hərbi müstəvidə fəaliyyətini daha da genişləndirə bilər
Ehtiyatda olan polkovnikin sözlərinə görə, Azərbaycan bundan sonrakı mərhələdə, hərbi müstəvidə fəaliyyətini daha da genişləndirə bilər. Ermənistan nəhayət anlamalıdır ki, onlar 2020-ci ildə artıq üçtərəfli Bəyanata imzalamaqla etiraf ediblər ki, doğma ərazilərimiz tam şəkildə Azərbaycan dövlətinin nəzarətinə qaytarılmalıdır: “Təəssüflər olsun ki, Ermənistan və ona havadarlıq edən ölkələr bu prosesi uzatmağa çalışırlar. Bu məsələ gələcək nəsillərə saxlanıla bilməz. Əks təqdirdə, Silahlı Qüvvələrimiz məcburiyyət qarşısında qalıb güc amilindən istifadə edəcək. Hesab edirəm ki, “Qisas-3” əməliyyatı həyata keçirilməlidir. Çünki bizim hazırda gördüyümüz mənzərə ondan ibarətdir ki, separatçılar və onların havadarları 2020-ci il noyabrın 10-da imzalanmış sənədə əməl etmirlər. Bundan başqa, Dövlət Sərhəd Xidməti separatçıların Laçın sərhəd-buraxılış məntəqəsindən hərbi silah-sursat daşımaq üçün istifadə etmək imkanlarını məhdudlaşdırıb. Eləcə də Qarabağdakı Rusiya sülhməramlıları da vəzifə borclarını hələ də layiqincə dərk etməyiblər. Azərbaycan Ordusunun mövqeləri qarşısında uzunmüddətli fortifikasiya qurğularını tikməklə separatçılar bizə xatırladırlar ki, erməni terrorçular silahı yerə qoymaq və təhvil vermək niyyətində deyillər. Onlar yenə də Azərbaycana güc nümayiş etdirməyi planlaşdırırlar”.
Ekspert bildirib ki, Azərbaycanın komando hərbi hissələri qısa müddətdə Qarabağ ərazisində terrorçuları təmizləmək gücündədir. Yəqin ki, Ermənistanın baş naziri Nikol Paşinyan Brüssel görüşündən sonra havadarlarından növbəti təlimat alıb. Bu özünü son günlər aktivləşən separatçıların və qarşı tərəfin hərəkətlərində də aydın şəkildə büruzə verir. ATƏT-in keçmiş Minsk qrupu 30 il ərzində Qarabağ münaqişəsini həll edə bilmədi. Lakin Ordumuz Ali Baş Komandanın rəhbərliyi ilə şəhidlərimizin qanı və canı, əsgər və zabitlərimizin böyük şücaəti hesabına qısa müddətdə bu problemi həll etməyi bacardı. Proseslər onu göstərir ki, Azərbaycan rəhbərliyinin mesajlarından nəticə çıxarmaq istəməyən Ermənistan və onun havadarları yaxın zamanlarda bunun faciəli nəticələrinin döyüş meydanında şahidi olacaqlar.
Bölmənin digər xəbərləri
