Könül Nurullayeva: Azərbaycan İkinci Qarabağ müharibəsindən sonra kənd təsərrüfatı infrastrukturunun fəal inkişaf mərhələsindədir
Bakı, 18 iyul, AZƏRTAC
İqlim dəyişkənliyi, dünya əhalisinin sayının artması və ərzaq təhlükəsizliyi əksər beynəlxalq təşkilatların gündəliyində vacib məsələlərdəndir. COVID-19 böhranı və xüsusilə, Ukraynadakı hərbi əməliyyatlar qlobal ərzaq təhlükəsizliyi üçün böyük təhlükə yaradır. Münaqişələr və müharibələr qlobal bazarda təklifin aşağı olmasına və qiymətlərin bahalaşmasına, ərzaq qıtlığına gətirib çıxarır. Qlobal sülh və tolerantlıq naminə ərzaq təhlükəsizliyi məsələləri bütün ölkələr, o cümlədən Azərbaycan üçün getdikcə aktuallaşır. Çünki kənd təsərrüfatı məhsullarının ixracının artmasına baxmayaraq, Azərbaycan da hələ də bəzi kənd təsərrüfatı məhsullarının alıcısıdır. Lakin 2020-ci ildə İkinci Qarabağ müharibəsindən sonra ölkəmiz işğaldan azad olunmuş ərazilərdə kənd təsərrüfatı infrastrukturunun fəal inkişaf mərhələsindədir.
Bunu Milli Məclisin deputatı Könül Nurullayeva üzvü olduğu Tolerantlıq və Sülh üzrə Beynəlxalq Parlamentin 10-cu sessiyasında “Qida təhlükəsizliyi: Qlobal sülh və tolerantlığın əsas ilkin şərti” mövzusunda müzakirələr zamanı deyib.
Deputat qeyd edib ki, Qarabağ Azərbaycanın təbii sərvətləri ilə zəngin, həmçinin kənd təsərrüfatı üçün ən münbit torpağı və bol suyu olan ərazisidir. Yeni azad edilmiş bu ərazilər təbiət və iqlim qurşağının müxtəlifliyinə görə həm daxili istehlak, həm də ixrac üçün böyük kənd təsərrüfatı istehsalı potensialına malikdir. Qeyd olunub ki, bu ərazilərdə kənd təsərrüfatının inkişafı təkcə Azərbaycanın deyil, bütün regionun ərzaq təhlükəsizliyinin yaxşılaşdırılmasına kömək edə bilər. Bu istiqamətdə atılacaq addımlar həm regiona yeni investorlar cəlb edə, həm də kənd təsərrüfatı sahəsində Azərbaycanla artıq tərəfdaşlıq əlaqələri qurmuş ölkələrə fayda gətirmək imkanına malikdir.
K.Nurullayeva bildirib ki, beynəlxalq bazarlarda təchizatı saxlamaq və qiymət artımlarını minimuma endirmək üçün ölkələr ərzaq və gübrələri sanksiyalardan çıxarmalı, ixrac məhdudiyyətlərini aradan götürməlidirlər. Onun sözlərinə görə, bu yolla müharibənin səbəb olduğu qlobal kənd təsərrüfatı və ərzaq təhlükəsizliyinin pozulmasının təsirlərinin qarşısını almaq mümkündür.
Deputat bildirib ki, qlobal ərzaq təhlükəsizliyinin artmasına səbəb olan digər amil isə ərzaq tullantılarıdır. Hər il 1,3 milyard ton qida israf edilir və bu miqdarı minimuma endirmək, ərzaq təhlükəsizliyini təmin etmək üçün xüsusilə inkişaf etməkdə olan ölkələrdən olan kiçik fermerlər üçün ərzaq itkisini əhəmiyyətli dərəcədə azalda biləcək ucuz saxlama üsullarının tətbiq edilməsi yaxşı olardı. Ədalətsiz ticarət nizamlanmalarına görə bəzi fermerlər yerli əhalini qida ilə təmin edə bilmir.
Qeyd edək ki, Mərakeşin paytaxtı Rabat şəhərində keçirilən tədbirdə Mərakeş Nümayəndələr Palatasının sədri Rəşid Talbi Alami, Mərakeş Krallığı Məşvərətçilər Şurasının sədri Elnaam Mayara, Tolerantlıq və Sülh üzrə Beynəlxalq Parlamentin prezidenti Marqarita Restrepo, eyni zamanda Tolerantlıq və Sülh üzrə Qlobal Şuranın prezidenti Əhməd bin Məhəmməd Əl Cərvan, Parlamentlər Birliyinin sədri Duarte Paçeço, eləcə də müxtəlif ölkələrin parlament sədrləri və deputatlar çıxış ediblər.
Bölmənin digər xəbərləri
