“KRASNOYE SORMOVO” GƏMİQAYIRMA ZAVODUNUN DİREKTORU NİKOLAY JARKOVUN ÇIXIŞI
Hörmətli qonaqlar!
Xəzər Dəniz Gəmiçiliyindən olan əziz dostlar!
Biz sizinlə birgə işin 100 illiyini qeyd etmişik. Veteranlarımız, indiki nəsil dostluğu və artıq 100 ildən çoxdur davam edən əməkdaşlığımızı göz bəbəyi kimi qoruyurlar. Muzeylərimizdə, müəssisələrimizin muzeylərində bu illər ərzində inşa olunmuş gəmilərin çoxsaylı maketləri, fotoşəkilləri saxlanılır. Təbiidir ki, müəssisələrimizin tarixini yaradan, onları perspektivli və uğurlu edən insanların fotoşəkilləri də var. İndi davam etdirdiyimiz işin bünövrəsini də babalarımız qoymuşlar. Bir sözlə, biz bütün bunlara görə onlara hədsiz minnətdarıq.
1903-cü ildə Sormovo gəmiqayırma zavodu Xəzər Gəmiçiliyinin sifarişi ilə daxiliyanma mühərrikli ilk neftdaşıma tankeri inşa etmişdir. Sonralar onlarca digər müxtəlif yük və sərnişin gəmiləri, o cümlədən uzun illər ərzində Bakı-Krasnovodsk xəttində işləmiş gəmi-bərələr də olmuşdur. Allaha şükür ki, indi biz birgə əməkdaşlıq ənənəsini bərpa etmişik. Biz bu ənənəni qoruyuruq və əlbəttə, son illər göndərdiyimiz gəmilərə görə Xəzər Gəmiçiliyi qarşısında çox böyük məsuliyyət hiss edir və çalışırıq ki, onlar daim işləsinlər.
2004-cü ildə Xəzər Dəniz Gəmiçiliyinin rəisi Aydın Bəşirov qarşımızda, sanki həyata keçirilməsi mümkün olmayan bir vəzifə – yük tutumu 13 min ton olan gəmi inşaetmə vəzifəsi qoydu. Bizim öz konstruktor büromuz var. Lakin Xəzər Gəmiçiliyinin mütəxəssisləri də bizə çox kömək göstərdilər və bu, həmin vəzifəni yerinə yetirməyə imkan verdi. Biz çox şadıq ki, indi bu gözəl gəminin təqdimatı keçirilir. Burada ona baxdıqda, mənə elə gəldi ki, o, hansısa yeni bir gəmidir. Siz burada ona qeyri-adi bir gözəllik vermisiniz. Çünki bu gəmi Sormovodan yola düşəndə tamam başqa cür idi. Odur ki, komandanın bu gəmiyə belə münasibətinə görə ürəkdən minnətdaram.
Baş tankerə zəmanəmizin görkəmli dövlət və siyasi xadimi Heydər Əlirza oğlu Əliyevin adı verilmişdir. Heydər Əlirza oğlu Əliyevin vaxtilə ümumi dövlətimizin, ümumi Vətənimizin – Sovet Sosialist Respublikaları İttifaqının inkişafında çox böyük xidmətləri olmuşdur. Ona görə də Rusiya xalqı Heydər Əliyevin xatirəsi önündə həmişə baş əyir. Bu insan nəinki müstəqil Azərbaycanı yaratmışdır, həm də vaxtilə ümumi Vətənimiz üçün çox işlər görmüşdür. Buna görə də əminəm ki, baş tanker Xəzər Dəniz Gəmiçiliyinin bayraqdarı olacaqdır. Biz Sormovoda komanda ilə belə bir razılığa gəldik ki, bu gəmi daim işləməli, Gəmiçiliyə maksimum fayda gətirməlidir.
Noyabrın 11-də yük tutumu 13 min ton olan ikinci gəminin təhvil-təslimi haqqında akt imzalanacaqdır. Gələn il biz Xəzər Dəniz Gəmiçiliyinə üçüncü belə tankeri təhvil verəcəyik. Əlbəttə, istərdik ki, əməkdaşlığımız davam etsin. Rusiyanın çoxsaylı gəmiqayırma zavodları arasında məhz bizim müəssisəmizə üstünlük verildiyinə görə, mən zavodumuzun kollektivi adından Xəzər Dəniz Gəmiçiliyinin mütəxəssislərinə, rəhbərliyinə səmimi təşəkkürümüzü bildirmək istəyirəm. Şübhəsiz ki, məhz bizim zavodumuza üstünlük verilməsini çox əziz tuturuq.
Birgə işimizə görə sizə təşəkkür etmək, Xəzər Dəniz Gəmiçiliyindəki əziz dostlarıma xoşbəxtlik və firavanlıq arzulamaq istəyirəm. Xəzər Dəniz Gəmiçiliyinə böyük uğurlar və tərəqqi diləyirəm.
Sağ olun.
Bölmənin digər xəbərləri
