Kürdəmirdə zəhərlənmə hadisəsinin baş verdiyi restoranın fəaliyyəti məhdudlaşdırılıb – YENİLƏNİB 4 VİDEO
Bakı, 1 oktyabr, AZƏRTAC
Kürdəmir rayonunda yerləşən “Günəş” restoranında keçirilən toy məclisi zamanı baş verən zəhərlənmə hadisəsi ilə bağlı Azərbaycan Respublikasının Qida Təhlükəsizliyi Agentliyinin (AQTA) əməkdaşları tərəfindən araşdırma aparılıb.
AQTA-dan AZƏRTAC-a verilən məlumata görə, məclisdə istifadə olunan qida məhsulları toy sahibi tərəfindən restorana təqdim edilib.
Araşdırma zamanı istehlaka təqdim olunan qida məhsullarından, restoranda qida ilə təmasda olan işçilərin əllərindən, bundan əlavə mətbəxdə olan səthlərdən, alət və avadanlıqlardan yaxma nümunələri götürülərək müvafiq laboratoriyaya göndərilib.
Araşdırma yekunlaşanadək “Günəş” restoranının fəaliyyəti məhdudlaşdırılıb.
11:38
Sentyabrın 30-da Kürdəmir şəhəri ərazisində yerləşən iaşə obyektlərindən birində keçirilən məclisdə iştirak etmiş şəxslərdən 92 nəfərin qida zəhərlənməsi şübhəsi ilə xəstəxanaya müraciət etməsi faktı ilə bağlı rayon prokurorluğunda araşdırma aparılır.
AZƏRTAC xəbər verir ki, bu barədə Baş Prokurorluğun mətbuat xidmətinin Kürdəmirdə baş vermiş zəhərlənmə hadisəsi ilə bağlı yaydığı məlumatda bildirilib.
Qeyd olunub ki, zəhərlənmənin səbəbinin müəyyənləşdirilməsi məqsədilə iaşə obyektindəki qidalardan nümunələr götürülərək müvafiq ekspertizalar təyin edilib və digər zəruri prosessual hərəkətlər icra olunub.
Zəhərlənmə nəticəsində xəstəxanaya müraciət etmiş şəxslərə zəruri ilkin tibbi yardım göstərilib və onlar ambulator nəzarətə götürülməklə evlərinə buraxılıblar.
10:21
Sentyabrın 30-u saat 20:50 radələrində 91 nəfər zəhərlənmə şübhəsi ilə Kürdəmir Rayon Mərkəzi Xəstəxanasına hospitalizasiya olunub.
AZƏRTAC xəbər verir ki, bu barədə Tibbi Ərazi Bölmələrini İdarəetmə Birliyinin Kürdəmir rayonunda baş verən zəhərlənmə hadisəsi ilə bağlı yaydığı məlumatda bildirilib.
Qeyd olunub ki, onların hər birinə zəruri tibbi xidmət göstərilib, vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar.
10:09
Azərbaycan Qida Təhlükəsizliyi Agentliyi (AQTA) Kürdəmir rayonunda qeydə alınan zəhərlənmə hadisəsi ilə məlumat yayıb.
AQTA-dan AZƏRTAC-a bildirilib ki, Kürdəmirdə yerləşən “Günəş” şadlıq sarayında keçirilən toy mərasimində baş verən zəhərlənmə hadisəsi ilə bağlı agentlik tərəfindən araşdırma aparılır.
Hadisənin səbəblərinin müəyyənləşdirilməsi istiqamətində agentlik müvafiq tədbirlər görür. Araşdırmanın nəticələri barədə ictimaiyyətə əlavə məlumat veriləcək.
00:19
Kürdəmirdə toy məclisindən sonra qonaqlar xəstəxanaya müraciət edib.
AZƏRTAC-ın bölgə müxbiri xəbər verir ki, bu gün Kürdəmir rayonunda keçirilən toy məclisindən sonra halı pisləşən bir neçə qonaq gecə saatlarından etibarən Kürdəmir Rayon Mərkəzi Xəstəxanasına müraciət edib.
Hazırda da xəstəxanaya müraciət edənlərin olduğu bildirilir. Hadisənin qida zəhərlənməsi ilə əlaqəli olub-olmadığı araşdırılır.
Müxbir - Rəşad Türkoğlu
Bölmənin digər xəbərləri
