LİSENZİYALAŞDIRILAN FƏALİYYƏT NÖVLƏRİ ÜZRƏ DÖVLƏT RÜSUMLARI TƏXMİNƏN 2,5 DƏFƏ AZALDILMIŞDIR
Məlum olduğu kimi, Azərbaycan Prezidentinin 2002-ci il 2 sentyabr tarixli Fərmanı ilə “Azərbaycan Respublikasında bəzi fəaliyyət növlərinə xüsusi razılıq (lisenziya) verilməsi haqqında Qaydalar”, “Xüsusi razılıq (lisenziya) tələb olunan fəaliyyət növlərinin və onu verən icra hakimiyyəti orqanlarının siyahısı” və “Naxçıvan Muxtar Respublikasının icra hakimiyyəti orqanları tərəfindən xüsusi razılıq (lisenziya) verilən fəaliyyət növlərinin Siyahısı” təsdiq edilmişdir. Beləliklə, ölkədə mövcud olan lisenziyalaşdırma sistemi köklü surətdə yaxşılaşdırılmış, lisenziyalaşdırılan fəaliyyət növlərinin sayı 240-dan 30-a endirilmişdir. Başqa sözlə, yeni lisenziyalaşdırma sistemi ölkədə sahibkarlığın inkişafına geniş imkanlar açmışdır.
İqtisadi İnkişaf Nazirliyindən AZƏRTAC-a bildirmişlər ki, Prezident Fərmanlarından irəli gələn vəzifələrin icrasını təmin etmək məqsədi ilə nazirlik bir sıra hüquqi-normativ aktlar hazırlamışdır. “Fəaliyyət növlərinin xüsusiyyətindən asılı olaraq xüsusi razılıq (lisenziya) verilməsi üçün tələb olunan əlavə şərtlər barədə”, “Xüsusi razılıq (lisenziya) alınması tələb olunan bəzi fəaliyyət növlərinə xüsusi razılıq (lisenziya) verilməsinə görə ödənilən dövlət rüsumunun məbləğləri” və s. bu qəbil sənədlərdəndir. Azərbaycan Respublikası Nazirlər Kabinetinin müvafiq qərarı ilə təsdiq edilmiş bu sənədlərə əsasən, xüsusi razılıq (lisenziya) alınması qaydaları sadələşdirilmiş, tələb olunan sənədlərin sayı minimuma endirilmiş, şərtlər yüngülləşdirilmiş, məhdudiyyətlər aradan qaldırılmışdır.
Məsələn, tibb, əczaçılıq, auditor və turizm fəaliyyəti ilə məşğul olmaq üçün bir neçə illik staj tələb edilirdisə, indi bu, ləğv olunmuşdur.
Lisenziya tələb olunan fəaliyyət növlərinə lisenziya verilməsinə görə ödənilən dövlət rüsumları da azaldılmışdır. Misal üçün, rabitə xidməti fəaliyyəti üzrə dövlət rüsumunun məbləği 600 milyon manatdan 27,5 milyon manata, bank fəaliyyəti üzrə 40 milyon manatdan 27,5 milyon manata, kartoqrafiya fəaliyyəti üzrə 1,5 milyon manatdan 660 min manata, fond birjasının fəaliyyəti üzrə 40 milyon manatdan 27,5 milyon manata, bütün növ qiymətli kağızların hazırlanması və satışı üzrə 20 milyon manatdan 16,5 milyon manata, turizm fəaliyyəti üzrə 8 milyon manatdan 2,75 milyon manata endirilmişdir.
Ümumiyyətlə, xüsusi razılıq (lisenziya) müddətinin 2 ildən 5 ilə qədər uzadılması nəticəsində lisenziyalaşdırılan fəaliyyət növləri üzrə dövlət rüsumları təxminən 2,5 dəfə azalmışdır.
Nazirlikdən onu da bildirmişlər ki, “Azərbaycan Respublikasında vahid lizensiya reyestrinin aparılması Qaydaları”, “Xüsusi razılığın (lisenziyanın) forması və onun doldurulması Qaydaları”, “Lisenziyalaşdırma sahəsində qanunvericiliyə riayət edilməsinə nəzarət və lisenziya blanklarının instifadəsinin uçotunun aparılması qaydaları” hazırlanmış və dövlət qeydiyyatına alınmışdır. Yeni qaydalara əsasən, vahid reyestrə daxil olan məlumatlar xüsusi forma üzrə tərtib olunaraq, hər ayın 10-dək lisenziya verən dövlət orqanı tərəfindən İqtisadi İnkişaf Nazirliyinə təqdim edilməlidir. Bu sənədlərlə lisenziya verən dövlət orqanlarının lisenziyalaşdırma sahəsində qanunvericiliyə riayət etməsinə nəzarətin həyata keçirilməsi, lisenziya almış fiziki və hüquqi şəxslər tərəfindən lisenziya tələblərinə və şərtlərinə riayət olunmasına dair məlumatların doldurulması, lisenziya blanklarının hazırlanmasına sifariş verilməsi, onların bölgüsü və istifadəsinin uçotunun aparılması qaydaları da müəyyən olunmuşdur.
Yeni lisenziyalaşdırma sisteminin tətbiqi azad rəqabətin inkişafına, istehsal olunan məhsulun, göstərilən xidmətin keyfiyyətinin yüksəlməsinə kömək edəcəkdir.
Bölmənin digər xəbərləri
