Lissabondakı daşqın yolların bağlanmasına səbəb olub
Lissabon, 13 dekabr, AZƏRTAC
Lissabona yağan yağışların səbəb olduğu daşqınlardan sonra məktəblər, institutlar, şəhər tunelləri, küçələr və avtomagistrallar bağlı olaraq qalır.
AZƏRTAC xəbər verir ki, Portuqaliya paytaxtının meri Karlos Moedasın sözlərinə görə, bəzi rayonlar çox ağır vəziyyətdədir. Bu, mülki müdafiə qruplarını şəhərin bəzi yerlərində aşağı mərtəbələrdə yaşayan insanları təxliyə etməyə vadar edib. Gecə saatları ərzində daşqınlarla bağlı 250 insident qeydə alınıb. Son rəqəmlər yaxın saatlarda məlum olacaq.
Milli fövqəladə hallar və mülki müdafiə idarəsi bildirib ki, Lissabonda 25 Aprel Körpüsünə bəzi çıxışlar da daxil olmaqla, 18 yol bağlanıb. Bələdiyyə palatası şəhər daxilində gediş-gəlişdən imtina etmək xahişi ilə əhaliyə müraciət edib.
Daşqın nəticəsində Oeyraş şəhərində birinci mərtəbədə yaşayan 75 yaşlı qadın ölüb.
Portuqaliya Dəniz və Atmosfer İnstitutunun prezidenti Migel Miranda yaxın bir neçə saatda vəziyyətin pisləşə biləcəyi barədə xəbərdarlıq edib və əhaliyə evdən işləməyi təklif edib.
AZƏRTAC-ın xüsusi müxbiri
Lissabon
Bölmənin digər xəbərləri
