Litvada Xocalı faciəsi haqqında filmin təqdimatı keçirilmişdir
Bakı, 21 fevral (AZƏRTAC). Litvanın böyük kinoteatrlarından olan “Vinqisdə” Xocalı faciəsi ilə bağlı ictimaiyyət üçün fərdi təhqiqat aparan litvalı və skandinaviyalı rejissorların hazırladığı “Sonu olmayan dəhliz” (“Endless corridor”) sənədli filminin təqdimatı keçirilmişdir.
“Xocalıya ədalət” beynəlxalq kampaniyasının Litva üzrə əlaqələndirmə qrupundan AZƏRTAC-a bildirmişlər ki, bu ekran əsəri xarici rejissorların Xocalı mövzusu ilə bağlı çəkdikləri ilk sənədli filmdir.
Təqdimat mərasimində Litvanın aparıcı KİV-lərinin nümayəndələri, parlamentin deputatları, dövlət və hökumət rəsmiləri, diplomatik korpusun təmsilçiləri, Azərbaycanın bu ölkədəki səfiri Həsən Məmmədzadə və tanınmış kinematoqrafçılar iştirak etmişlər.
Mərasimi açan rejissor Mindaqus Urbanoviç bildirmişdir: “Biz çalışdıq avropalı tamaşaçılara Qarabağ müharibəsinin ən dəhşətli səhifəsini - təəssüf ki, Qərbdə az tanınan Xocalı faciəsini göstərək”.
Filmin prodüseri Andryus Brokas isə demişdir: “Biz üç ildən çox işlədik. Bu müddət ərzində yaradıcı qrupumuz Ermənistandan qovulması faktı da daxil olmaqla bir çox çətinlikləri dəf etmişdir. Amma bütün bunlara baxmayaraq, işimizi yekunlaşdıra bildik”.
“Xocalı mənim həyatımı dəyişdi”, - deyən ekran əsərinin əsas qəhrəmanlarından biri, jurnalist-tədqiqatçı Riçards Lopaytis filmdən sonra başqa adam olduğunu qeyd etmişdir. O vurğulamışdır ki, onun tədqiqatının məqsədi Azərbaycan xalqının başına gətirilmiş bu dəhşətli hadisə ilə bağlı insanların gözlərini açmaq və kütləvi qırğını törədənləri tövbə etməyə çağırmaqdır.
Ekran əsərinin nümayişi xüsusi olaraq film üçün bəstələnmiş rekviyemin canlı səslənməsi ilə başlamışdır. Nümayişi zamanı sıravi tamaşaçılar hisslərini gizlədə bilməmiş, göz yaşları axıtmışlar.
Filmi izlədikdən sonra fikirlərini bölüşən festivalın direktoru Vida Ramaşkiene demişdir: “Bu ekran əsəri məni sarsıtmış və yeni kəşf olmuşdur. Biz hamımız Dağlıq Qarabağ münaqişəsindən xəbərdarıq, amma bu epizod faciənin bütün dərinliyini və azərbaycanlıların əzablarını hiss etməyə və məsələyə yeni prizmadan baxmağa bizləri məcbur etmişdir. Film əla alınmışdır və biz onu beynəlxalq kino müsabiqələrinin proqramına daxil etmişik”.
Filmin daha bir qəhrəmanı moskvalı jurnalist Viktoriya İvleva demişdir ki, 1992-ci il fevralın 25-dən 26-na keçən gecədən sonra onun həyatında əsaslı dəyişikliklər baş vermişdir. Bu faciədə o, cəmi iki gün əvvəl dünyaya gəlmiş qız uşağını xilas etmiş və bunu həyatının ən əhəmiyyətli hadisəsi kimi qiymətləndirmişdir.
Ekran əsəri erməni hərbi hissələri tərəfindən işğal olunmuş və məhv edilmiş Xocalı şəhəri ilə bağlı tədqiqatdan ibarətdir. Filmdə həmin dəhşətli gecədə möcüzə nəticəsində xilas olmuş iki Xocalı sakininin taleyindən də bəhs edilir. Bu filmin siqnal versiyasının təqdimatı “Xocalıya ədalət” beynəlxalq kampaniyasının dəstəyi ilə Bakı və Moskva şəhərində keçirilmişdir.
“Xocalıya ədalət” beynəlxalq kampaniyası 2008-ci il mayın 8-də, Şuşanın işğalı günü Dialoq və Əməkdaşlıq Uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyeva tərəfindən irəli sürülmüşdür. Hazırda faciəyə siyasi-hüquqi qiymətin verilməsinə yönəlmiş bu kampaniya dünyanın 35-dən çox ölkəsində uğurla həyata keçirilir.
Bölmənin digər xəbərləri
