“Luç” Mədəniyyət Xadimləri Assosiasiyası öz fəaliyyətinə yekun vurmuşdur
Bakı, 3 noyabr (AZƏRTAC). “Luç” Mədəniyyət Xadimləri Assosiasiyasının növbəti iclası olmuşdur. İclasda təşkilati məsələlərə baxılmış, Assosiasiyanın fəaliyyətinə yekun vurulmuş, iki sənədli filmin təqdimatı olmuşdur.
Bakı Slavyan Universitetinin professoru Çingiz Bədəlov “Luç” Assosiasiyasının işində fəal iştirakına görə və anadan olmasının 80 illiyi münasibətilə fəxri fərmanla təltif edilmişdir.
Assosiasiyanın sədri professor Həsən Quliyev Tədbirlər Planını təqdim etmişdir. Planda Antologiya və bülleten buraxılışı, yazıçıların yaradıcılıq gecələrinin keçirilməsi, həmçinin sənədli film çəkilişinə hazırlıq və iki mükafatın (Molla Pənah Vaqif və “Nar” mükafatlarının) təqdim edilməsi üzrə müsabiqələr elan olunması nəzərdə tutulur.
Professor H.Quliyev xatırlatmışdır ki, “Luç” Mədəniyyət Xadimləri Assosiasiyası ədəbi-publisistik və poetik müsabiqələr təşkil edir. Bu il “Eurovision-2012” mahnı müsabiqəsinə həsr edilmiş “Azərbaycan dəyişən dünyada” adlı müsabiqə keçirilmiş, bu müsabiqənin yekunlarına əsasən kitab nəşr edilmişdir.
Cari ildə “İnterfaks-Azərbaycan” agentliyinin baş direktoru Aleksandr İvanov, Azərbaycan parlamentinin deputatları Elmira Axundova və Mixail Zabelin müsabiqəyə maliyyə dəstəyi göstərmişlər.
“Luç” Azərbaycan Mədəniyyət Xadimləri Assosiasiyası artıq 9 ildir ki, fəaliyyət göstərir. Bu müddətdə Assosiasiya Azərbaycanda rus dilinin qorunub saxlanmasında və inkişafında marağı olan insanları: Bakı universitetlərinin rus dili və ədəbiyyatı kafedralarında çalışan ədəbiyyatşünas və dilşünasları, rusdilli dövri nəşrlərin jurnalistlərini, həvəskar və peşəkar səviyyədə ədəbi yaradıcılıqla məşğul olan, habelə kino sənətinə maraq göstərən yaradıcı insanları öz sıralarında birləşdirməyə nail olmuşdur.
Qeyd etmək lazımdır ki, bu təşkilatın geniş əhatəli fəaliyyəti ədəbiyyat sahəsində bütün problemlərin həllinə yönəlmişdir. Onun ən başlıca məqsədi isə Rusiya ilə Azərbaycan arasında ədəbi əlaqələri inkişaf etdirmək, Azərbaycanda fəaliyyət göstərən rusdilli yazıçıları və rus dilinin inkişafını dəstəkləməkdir.
“Luç” Assosiasiyası 9 il ərzində dünya ədəbiyyatı və kinosunun korifeylərinin bu və ya digər yubiley tarixlərinə həsr edilmiş müxtəlif tədbirlər keçirmiş, 20-dən çox nəsr, poeziya və publisistika antologiyası nəşr etmişdir. Bu antologiyalardan biri rusiyalı, ikisi gürcüstanlı müəlliflərlə müştərək nəşr edilmişdir.
Ayrıca İnternet saytı (www.luch-az.com) olan “Luç” Assosiasiyasının xarici ölkələrdə 50 üzvü və Azərbaycanda daha 50 üzvü vardır. 2010-cu ildən başlayaraq “Luç” “Rus dilində ən yaxşı hekayə” nominasiyası üzrə Beynəlxalq müsabiqə keçirir. Bu müsabiqəyə 16 ölkədən 200-ə yaxın əsər göndərilmişdir.
H.Quliyev bildirmişdir ki, bu il Assosiasiyanın səyləri sayəsində “M.F.Axundov və rus ədəbiyyatı” adlı kitab nəşrə hazırlanmış, iki sənədli film çəkilmiş, Azərbaycan şəhərlərində rus dilinə aid ustad dərsləri keçirilmişdir.
Bununla bərabər, təşkilatın rəhbəri iclas iştirakçılarına kədərli bir xəbər verməli olmuşdur. H.Quliyev təəssüflə qeyd etmişdir ki, “Luç” Assosiasiyasının yerinə yetirdiyi vəzifələrin vacibliyinə və onun fəaliyyətində nəzərəçarpacaq uğurlara baxmayaraq, maliyyə çətinlikləri ucbatından onun fəaliyyətini müvəqqəti dayandırmaq planlaşdırılır.
Kitab nəşrini və film çəkilişini Assosiasiya üzvlərinin təşəbbüskarlığı və dəstəyi hesabına davam etdirmək mümkündür, lakin müsabiqə qaliblərinin mükafatlandırılması və geniş miqyaslı tədbirlər keçirilməsi üçün təkcə xoş niyyətlər kifayət deyildir. Ümid buna qalır ki, müvafiq təşkilatlar bütün bu illər ərzində yalnız öz üzvlərinin təşəbbüsü sayəsində fəaliyyət göstərmiş “Luç” Assosiasiyasının düşdüyü çətin vəziyyətə, nəhayət, diqqət yetirəcəklər.
İnanmaq istəməzdik ki, “bu dünyada pul hər şeyi həll edir” prinsipi dilin və ədəbiyyatın inkişafı kimi müqəddəs məsələlərə də şamil ediləcəkdir.
Bölmənin digər xəbərləri
