“Mançester Yunayted” klubu fransalı müdafiəçi Rafael Varanın keçidini elan edib
Bakı, 16 avqust, AZƏRTAC
“Mançester Yunayted” klubu “Real Madrid”in fransalı mərkəz müdafiəçisi Rafael Varanı heyətinə qatdığını rəsmi olaraq elan edib.
AZƏRTAC xəbər verir ki, R.Varanın transferi bir neçə gün əvvəl reallaşdırılsa da, klub bu barədə avqustun 16-da açıqlama yayıb. Bu gün, həmçinin 28 yaşlı müdafiəçinin təqdimat mərasimi keçirilib.
Rafael Varan yeni klubunda meydana 19 nömrəli forma ilə çıxacaq.
Qeyd edək ki, peşəkar karyerasına 2010-cu ildə “Lans” klubunda başlayan futbolçu bir il sonra “Real Madrid”ə transfer edilib. 2011-2021-ci illərdə “Real Madrid”in heyətində 236 oyunda meydana çıxan müdafiəçi 8 dəfə fərqlənib.
Fransa millisinin heyətində keçirdiyi 79 oyunda 5 qol vuran R.Varan 2018-ci ildə Rusiyada keçirilən dünya çempionatının qalibi olub.
Bölmənin digər xəbərləri
