Mars meteoritinin parçası “Sotheby's” hərracında 5,3 milyon dollara satılıb
Bakı, 18 iyul, AZƏRTAC
Yer üzündə tapılan ən böyük Mars meteoriti parçası (24,5 kiloqram) “Sotheby's” hərracında 5,3 milyon dollara satılaraq rekord qırıb.
AZƏRTAC “Reuters” agentliyinə istinadla xəbər verir ki, çərşənbə günü NWA 16788 kimi tanınan qaya parçası üçün keçirilən hərrac onlayn və telefon iddiaçıları arasında 15 dəqiqəlik tender mübarizəsinə səbəb olub. “Sotheby's”in vitse-prezidenti və elm və təbiət tarixi üzrə qlobal rəhbər Kassandra Hetton hərracdan əvvəl bildirib: “Bu, Marsın səthindən qopan heyrətamiz bir meteoritdir. Parça 2023-cü ilin noyabrında Nigerin ucqar Aqadez bölgəsindəki Sahara səhrasında meteorit tədqiqatçısı tərəfindən aşkar edilib. Oradakı insanlar bunun xüsusi bir qaya parçası olduğunu artıq bilirdilər. Laboratoriyaya çatana və parçalar yoxlanılana qədər anladıq ki, bu meteorit Mars mənşəlidir. Sonra aparılan tədqiqat nəticəsində onu başqa analoqları ilə müqayisə etdik və gördük ki, bu, Yer planetində Marsın ən böyük parçasıdır”.
Alimlər qeyd edirlər ki, təxminən 5 milyon il əvvəl bir asteroid və ya kometa Marsa o qədər güclü çırpılıb ki, qayalar və digər dağıntılar kosmosa səpələnib. Beləliklə, 140 milyon mil məsafədə kosmosdan keçərək Yer atmosferinə daxil olan Mars meteoritinin parçası planetimizin atmosferində peyda olub. O, daha sonra okeanın ortasında deyil, səhrada yerə düşüb.
Astronomların fikrincə, bu hadisə zamanı Yerin üzərində bir atmosfer təbəqəsi yaranıb. Ana planeti olan Mars kimi, NWA 16788 də açıq şəkildə qırmızımtıl rəngə malikdir, həmçinin onun üzərində Yer atmosferi vasitəsilə şiddətli enişindən qaynaqlanan qabığın əlamətləri görünür.
Yer kürəsində rəsmi olaraq tanınan 400-ə yaxın Mars meteoriti var və NWA 16788 onların ən böyüyüdür.
Bölmənin digər xəbərləri
