Masallıda istehlaka yararsız 227 kiloqram at əti aşkarlanıb
Masallı, 13 aprel, AZƏRTAC
Qida Təhlükəsizliyi Agentliyinin Lənkəran-Astara regional bölməsinin və DİN-in Masallı Rayon Polis Şöbəsinin əməkdaşlarının birgə keçirdikləri reyd zamanı istehlaka yararsız ümumi çəkisi 227 kiloqram ət aşkarlanıb.
AZƏRTAC-ın bölgə müxbiri xəbər verir ki, baxış zamanı məhsulun müvafiq müşayiətedici sənədləri və mənşəyi məlum olmayan at əti olduğu müəyyən edilib. At ətinin Biləsuvar kənd sakini Əzizov Məlik Sabir oğlu tərəfindən qanunsuz olaraq kəsildiyi, Kərimli Əmrah İslam oğlu tərəfindən isə 10 XP 977 dövlət qeydiyyat nişanlı “Nissan” markalı avtomobillə Bakı şəhərinə aparmağı planlaşdırdığı məlum olub. Yararsız ət saxlanca verilib. Nümunələr götürülərək laborator müayinələrə cəlb edilib. Fakt üzrə araşdırmalar davam etdirilir.
Müxbir - İlkin Adıyev
Bölmənin digər xəbərləri
