MDU-NUN HESABLAMA RİYAZİYYATI VƏ KİBERNETİKA FAKÜLTƏSİNİN III KURS TƏLƏBƏSİ ÜLFƏT ƏLİYEVİN ÇIXIŞI
-Çox hörmətli cənab Prezident!
Çox hörmətli Viktor Antonoviç!
Əziz dostlar!
Hesablama riyaziyyatı və kibernetika fakültəsinin III kurs tələbəsi, MDU-nun Azərbaycan klubunun sədri kimi bu gün mənə dünyanın ən nüfuzlu ali məktəblərindən biri olan M.V.Lomonosov adına Moskva Dövlət Universitetində təhsil alan 200-ə yaxın azərbaycanlı tələbə adından Sizi salamlamaq şərəfi nəsib olmuşdur. MDU-nun tələbəsi olmaq çox böyük şərəf və məsuliyyətdir və biz təhsil ocağımızda bunu hiss edirik.
Cənab Prezident, Azərbaycanda keyfiyyətli təhsilə, o cümlədən xaricdə təhsil almağa çox böyük əhəmiyyət verilir. Bildiyimiz kimi, ümummilli liderimiz Heydər Əliyev bu proqramla şəxsən məşğul olurdu, hər il azərbaycanlı gəncləri təhsil almaq üçün Rusiyaya göndərirdi. Bu gün biz Sizin proqramınızın, azərbaycanlı gənclərin xaricdə təhsil almasına dair 2007-2015-ci illər üçün nəzərdə tutulmuş proqramın şahidiyik. Artıq 2007-ci ildə universitetimizə dövlət xətti ilə Azərbaycan gəncləri daxil olmuşlar.
MDU-da hər bir azərbaycanlı özünü təkcə tələbə deyil, həm də öz ölkəsinin nümayəndəsi hesab edir. Hər birimiz əcnəbi qonaqları, dostlarımızı Azərbaycanın mədəniyyəti, tarixi, adət və ənənələri ilə tanış etməyə çalışırıq. Buna görə də MDBMİ tələbələrinin Azərbaycan klubu yaratmaq təşəbbüsünü dəstəkləyərək, biz MDU-da da belə bir klub yaratmaq qərarına gəldik. Klub fəal inkişaf edir, burada keçirilən intellektual şənbələrdə arzu edən hər kəs Azərbaycan haqqında məruzə edə bilər. Öz internet saytımız var. Moskva Dövlət Universiteti rəhbərliyinin və şəxsən Viktor Antonoviçin, Azərbaycan Respublikasının səfirliyinin, cənab Polad Bülbüloğlunun və Heydər Əliyev Fondunun Rusiya Federasiyasındakı nümayəndəliyinin sayəsində biz Azərbaycan Mədəniyyəti Mərkəzi layihəsi üzərində fəal işləyirik. Burada hər bir tələbə və sadəcə, arzu edən hər kəs milli tariximiz, mədəniyyətimiz, coğrafiyamız, gələcəkdə isə rəqslərimiz və musiqimizlə tanış ola bilər.
Çox hörmətli cənab Prezident!
Bu gün Sizin həyatınızda çox əlamətdar hadisədir. Bizim üçün, MDU-nun tələbələri üçün bu gün ikiqat əlamətdardır, çünki bu gündən biz Sizi, Azərbaycan Respublikasının Prezidenti İlham Heydər oğlu Əliyevi də MDU-nun fəxri professoru kimi öz müəllimimiz hesab edə bilərik.
İcazə verin, MDU-nun Azərbaycan klubu adından Sizə xoşbəxtlik, cansağlığı və Azərbaycan ilə Rusiya arasında dostluq əlaqələrinin inkişafı və möhkəmlənməsi, əlbəttə, Vətənimiz Azərbaycanın rifahı naminə fəaliyyətinizdə tükənməz qüvvə arzulayım. Cənab Prezident, Sizi təbrik edirəm.
VİKTOR SADOVNİÇİ: İcazənizlə, Moskva Unversitetinin fəxri professoru, Azərbaycan Prezidenti İlham Əliyevdən çıxış etməsini xahiş edirəm.
Bölmənin digər xəbərləri
