İcazə verin, Elmi Şuranın Azərbaycan Respublikasının Prezidenti İlham Heydər oğlu Əliyevə Moskva Dövlət Universitetinin fəxri professoru adı verilməsinə həsr edilmiş təntənəli iclasını açıq elan edim.

Hörmətli İlham Heydər oğlu!

Hörmətli qonaqlar, əziz həmkarlar!

Bu gün biz Azərbaycan Respublikasının Prezidenti, tanınmış siyasi xadim, görkəmli insan, siyasi elmlər doktoru və MDU-nun böyük dostu İlham Heydər oğlu Əliyevi Moskva Dövlət Universitetinin Elmi Şurasının iclas salonunda salamlayırıq.

İlham Əliyev 1961-ci il dekabrın 24-də Bakı şəhərində anadan olmuşdur. 1967-1977-ci illərdə o, Bakı şəhərində orta məktəbdə oxumuşdur. 1977-ci ildə Moskva Dövlət Beynəlxalq Münasibətlər İnstitutuna (MDBMİ) daxil olmuş, 1982-ci ildə oranı bitirərək, elə həmin ali məktəbin aspiranturasında təhsilini davam etdirmişdir. 1985-ci ildə dissertasiya müdafiə edərək, tarix elmləri namizədi alimlik dərəcəsi almışdır. 1985-1990-cı illərdə İlham Əliyev MDBMİ-nin Avropa və Amerika ölkələrinin tarixi və siyasəti kafedrasının müəllimi işləmişdir.

1994-cü ildən 2003-cü ilin avqust ayına qədər İlham Əliyev Azərbaycan Respublikası Dövlət Neft Şirkətinin vitse-prezidenti, daha sonra birinci vitse-prezidenti olmuşdur. O, Heydər Əliyevin irəli sürdüyü, respublika iqtisadiyyatını möhkəmlətmək və ölkəni dünyada layiqli səviyyəyə çatdırmaq məqsədi daşıyan neft strategiyasının həyata keçirilməsində fəal iştirak etmişdir. Bu vəzifədə işlədiyi dövrdə o, suveren Azərbaycanın neft siyasətinin geosiyasi aspektlərinə dair bir sıra tədqiqat işləri dərc etdirmiş və siyasət elmləri sahəsində doktorluq dissertasiyası müdafiə etmişdir. İlham Əliyev iki dəfə - 1995-ci və 2000-ci ildə Azərbaycan Respublikasının parlamentinin - Milli Məclisin deputatı seçilmişdir. 1999-cu ildə o, respublikanın iqtidar partiyası olan Yeni Azərbaycan Partiyasının sədr müavini, 2001-ci ildə sədrin birinci müavini, 2005-ci ildə isə bu partiyanın sədri seçilmişdir.

2001-2003-cü illərdə İlham Əliyev Avropa Şurası Parlament Assambleyasında Azərbaycan Respublikası parlamentinin nümayəndə heyətinin rəhbəri olmuşdur. İlham Əliyev 2003-cü il avqustun 4-də, parlament tərəfindən təsdiqləndikdən sonra Azərbaycan Respublikasının Baş naziri təyin edilmişdir. 2003-cü il oktyabrın 15-də İlham Heydər oğlu Əliyev Azərbaycan Respublikasının Prezidenti seçilmiş və oktyabrın 31-də bu vəzifədə işə başlamışdır. Prezident seçkilərində seçicilərin 76 faizdən çoxu ona səs vermişdir.

Bu gözəl insanın maraq dairəsi heyrətamiz dərəcədə çoxcəhətli və geniş, onun hərtərəfli istedadının tətbiq sahələri müxtəlifdir. İlham Əliyev 1997-ci ildən indiyə qədər Azərbaycan Milli Olimpiya Komitəsinin prezidentidir. İdmanın və olimpiya hərəkatının inkişafına böyük töhfələrinə görə o, Beynəlxalq Olimpiya Komitəsinin ali ordeni ilə təltif olunmuşdur.

2003-cü ilin yanvar ayında İlham Heydər oğlu Avropa Şurası Parlament Assambleyasının sədr müavini və Büro üzvü seçilmişdir. Assambleyanın işində fəal iştirakına, Avropa ideallarına sadiqliyinə görə 2004-cü ilin aprel ayında o, Avropa Şurası Parlament Assambleyasının fəxri üzvü diplomu və medalı ilə təltif edilmişdir. Azərbaycan Respublikasının Prezidenti rus, ingilis, fransız və türk dillərini də mükəmməl bilir. İlham Heydər oğlu çoxsaylı xarici mükafatlarla təltif olunmuşdur. O, bir sıra ölkələrdə müxtəlif universitetlərin fəxri titullarına layiq görülmüşdür.

Moskva Dövlət Universiteti Azərbaycanın ali məktəbləri ilə fəal əməkdaşlıq edir. Bakı Dövlət Universiteti, Azərbaycan Dövlət İqtisad Universiteti və başqaları ali məktəblərarası əməkdaşlıqda bizim aparıcı tərəfdaşlarımızdır.

Hörmətli İlham Heydər oğlu, bu gün Moskva Universiteti ilə Azərbaycan Respublikasının qarşılıqlı münasibətlərindən söhbət açanda mən Sizin atanız Heydər Əlirza oğlu Əliyevlə dostluğumun tarixini xatırlamaq istərdim. Bizim ilk görüşümüz 80-ci illərin axırlarında olmuşdu. O, Moskva Universitetinə gələndə mən hələ MDU-nun birinci prorektoru idim. SSRİ-nin birinci rəhbərlərindən olan Heydər Əlirza oğlu o vaxt Nazirlər Sovetinin sosial məsələlər üzrə Bürosuna rəhbərlik edirdi və MDU-nun əmək kollektivi ilə görüşlər keçirmək və ünsiyyətdə olmaq üçün buraya gəlirdi. O vaxt Heydər Əliyevlə həmin görüşdə qəbul edilmiş Moskva Universitetinin inkişafı proqramının həyata keçirilməsi mənə tapşırılmışdı. Sonralar biz Moskvada və Azərbaycanda keçirilən müxtəlif tədbirlərdə dəfələrlə görüşmüşdük. 2000-ci ildə Bakıda, Bakı Universitetinin 80 illiyi bayram edilərkən bizim görüşümüzdən aldığım dərin təəssürat hələ də yadımdadır. Əvvəlcə qısa söhbət şəklində planlaşdırılan bu görüş iki saatdan çox davam edən dostcasına söhbətə çevrildi. Yadımdadır, Heydər Əliyev bütün adamları, onlarla nə vaxt görüşdüyünü yada salır, onların indi harada işlədikləri, nə ilə məşğul olduqları ilə maraqlanır, Moskva Universitetinin taleyi barədə suallar verirdi.

Bir məqamı da xatırlatmaq mənə çox xoşdur ki, 2002-ci ildə Heydər Əlirza oğlu Əliyev artıq Prezident kimi Moskva Universitetinə gəlmiş və bizim universitetdə bayram kimi qeyd edilən Tatyana gününə həsr olunmuş təntənəli iclasda iştirak etmişdi. Həmin gün ona MDU-nun fəxri professoru adı verilmişdi.

Heydər Əliyev görkəmli insan idi, onun məhsuldar həyatı həm SSRİ-nin, həm də yeni Rusiyanın və yeni Azərbaycanın tarixi ilə sıx bağlı idi. O, Moskva Universitetinə dəfələrlə ən müxtəlif sahələrdə kömək və dəstək göstərmişdi.

Bu günün hadisələrinə qayıdaraq, Azərbaycana son səfərim barədə söhbət açmaq istərdim. Keçən il may ayında biz Bakı Dövlət Universitetində olduq, rektor Məhərrəmovla Azərbaycanda MDU-nun filialının yaradılması məsələsini müzakirə etdik. Bu səfərin gedişində biz İlham Heydər oğlu ilə görüşmək şərəfinə də nail olduq. Həmin görüşdə MDU-nun filialının yaradılması ideyası səsləndi və qəbul edildi. Biz bu niyyətin həyata keçirilməsi perspektivlərini və planlarını müzakirə etdik.

Əlbəttə, mən bizim planlarımız haqqında, birgə işimizin səmərəli olması barədə hələ çox danışmaq istərdim, lakin təəssüf ki, bu mərasimin vaxtı məhduddur. Ona görə də icazə verin, buraya toplaşanların qarşısında Moskva Universitetinin Elmi Şurası tərəfindən qəbul olunmuş qərarı elan edim.

Möhtərəm İlham Heydər oğlu, mən böyük məmnuniyyətlə bildirmək istəyirəm ki, Rusiya ilə Azərbaycan arasında əlaqələrin möhkəmlənməsinə, Rusiya və Azərbaycan xalqlarının rifahı naminə elmin və təhsilin inkişafına görkəmli töhfənizi nəzərə alaraq və Moskva ilə səmərəli əməkdaşlığınıza görə MDU-nun Elmi Şurası Sizə Moskva Universitetinin fəxri professoru adı verilməsi barədə qərar qəbul etmişdir.

İcazə verin, MDU-nun fəxri professoru diplomunu Sizə təqdim edim.

X X X

Viktor Sadovniçi M.V.Lomonosov adına Moskva Dövlət Universitetinin Elmi Şurasının qərarını oxudu:

“Rusiya ilə Azərbaycan arasında əlaqələrin möhkəmlənməsinə, Rusiya və Azərbaycan xalqlarının rifahı naminə elmin və təhsilin inkişafına görkəmli töhfələrinə və Moskva Universiteti ilə səmərəli əməkdaşlığına görə İlham Heydər oğlu Əliyevə Moskva Universitetinin fəxri professoru adı verilsin. Bu ad ona qanunla və adətlərlə müəyyən olunmuş bütün şərəf və imtiyazlar hüququnu təmin edəcəkdir”.

Rektor Azərbaycan Prezidenti İlham Əliyevə MDU-nun fəxri professoru diplomunu və medalını təqdim etdi.