Mədəniyyət və Turizm Nazirliyi regionlarda monitorinq keçirir
Bakı, 25 iyun (AZƏRTAC). Mədəniyyət və Turizm Nazirliyi iyunun 20-dən respublikanın bölgələrində fəaliyyət göstərən mehmanxana və mehmanxana tipli obyektlərdə monitorinqlərə başlamışdır.
Nazirliyin turizm şöbəsi müdirinin müavini Mahir Qəhrəmanov AZƏRTAC-a bildirmişdir ki, məqsəd yay turizm mövsümünün başlanması ilə əlaqədar bölgələrdə fəaliyyət göstərən mehmanxana və mehmanxana tipli obyektlərdə mövsümə hazırlığın səviyyəsini və göstəriləcək turist xidmətlərinin qiymətlərini araşdırmaqdır. Monitorinqin birinci mərhələsi iyunun 20-dən 25-dək ölkəmizin şimal-qərb regionu üzrə Qax, Şəki, Qəbələ, İsmayıllı və Şamaxı rayonlarını əhatə edir.
Monitorinqlərdə Mədəniyyət və Turizm Nazirliyinin, Azərbaycan Turizm Assosiasiyasının nümayəndələri, İqtisadi İnkişaf Nazirliyi Şəki-Zaqatala regional bölməsinin əməkdaşı və rayon mədəniyyət və turizm şöbələrinin rəhbərləri iştirak edirlər.
Monitorinqlərin sonrakı mərhələsi şimal və cənub zonalarında fəaliyyət göstərən turizm obyektlərində keçiriləcəkdir.
Bölmənin digər xəbərləri
