Media: Apreldə Avropadan ABŞ-a işgüzar səfərlər 26 faiz azalıb
Bakı, 21 may, AZƏRTAC
Aprel ayında Avropadan ABŞ-a işgüzar səfərlər 2024-cü ilin eyni dövrü ilə müqayisədə 26 faiz azalıb ki, bu da Prezident Donald Trampın tarif siyasəti fonunda Birləşmiş Ştatlara etibarın azalmasını əks etdirir.
AZƏRTAC xəbər verir ki, “Politico” nəşri bu barədə Londonun “HotelHub” platformasına istinadla məlumat yayıb.
Qeyd olunur ki, Prezident Donald Tramp hakimiyyətə gələndən və xüsusən Vaşinqtonun tarif siyasətindən sonra ABŞ-la ənənəvi tərəfdaşlıqda bir çox problemlər yaranıb. Ekspertlərin sözlərinə görə, Vaşinqtonun tətbiq etdiyi yüksək tariflər şirkətləri daha stabil bazarlar axtarmağa sövq edib.
ABŞ-a işgüzar səfərlərdə ən çox azalma Almaniyada qeydə alınıb - 30,4 faiz. Fransada bu göstərici 22,4 faiz, Böyük Britaniyada isə 14,4 faiz təşkil edib.
Xatırladaq ki, aprelin 2-də ABŞ Prezidenti Donald Tramp 185 ölkənin məhsullarına gömrük rüsumunun tətbiq ediləcəyini açıqlayıb. Yeni tarif siyasəti çərçivəsində 10 faizlik universal rüsumlar aprelin 5-də, fərdi rüsumlar isə aprelin 9-da qüvvəyə minib. Bundan başqa, Ağ ev aprelin 3-dən etibarən ölkəyə idxal olunan bütün avtomobillərə 25 faizlik gömrük rüsumu tətbiq edib.
Bölmənin digər xəbərləri
