Meksikada Frida Kaloya həsr olunmuş yeni muzey açılacaq
Bakı, 30 may, AZƏRTAC
Rəssam Frida Kalonun həyat və yaradıcılığına həsr olunmuş yeni Casa Kahlo muzeyi bu payızda Meksikanın Koyoakan şəhərində açılacaq.
AZƏRTAC xarici mətbuata istinadla xəbər verir ki, “Rockwell Group” şirkəti tərəfindən layihələndirilən muzey Kalonun valideynləri tərəfindən satın alınan və rəssam və onun bacılarına verilən şəxsi iqamətgahı olan Casa Rojada yerləşəcək. O, rəssamın ömrünün çox hissəsini yaşadığı evdə yerləşən mövcud Frida Kalo Muzeyinə bitişik olacaq.
Frida Kalo Muzeyi rəssamın həyat yoldaşı Dieqo Rivera ilə həyatından bəhs edir, yeni muzey isə Kalonun mənşəyi tarixini tədqiq edəcək.
Hazırda Mexikodakı Yaddaş və Tolerantlıq Muzeyinin akademik direktoru olan Adan Qarsia Fahardo Casa Kahlo muzeyinin direktoru olacaq.
Casa Kahlo muzeyində indiyə qədər heç vaxt sərgilənməmiş şəxsi əşyalar, o cümlədən məktublar, uşaqlıq fotoşəkilləri, gəlinciklər, bəzək əşyaları, geyimlər və Kalonun ilk yağlı boya ilə yazılmış tablosu nümayiş olunacaq.
Casa Roja muzeyə rəssamın ən yaxın qohumu və varisi Mara Romeo Kalo tərəfindən verilib. “Bu, ailəmizin çoxdankı arzusudur. Fridanın irsi dünyaya aiddir, lakin o, burada - bu torpaqda, bu evlərdə və onu formalaşdıran mədəniyyətdən başlayır. Muzey bizə yeni hekayələr danışmağa, ailə sirlərini bölüşməyə, yeni səsləri qəbul etməyə və onun ruhunu şərəfləndirən gələcək qurmağa imkan verəcək”, - deyə Maro Romeo bildirib.
Nyu-Yorkda yerləşən və Kalo ailəsi tərəfindən təsis edilən “Fundación Kahlo” yeni qeyri-kommersiya təşkilatı muzeyin inkişafına, açılışına və idarə olunmasına nəzarət edəcək.
Casa Kahlo muzeyinin açılışı sentyabrın 27-də olacaq.
Bölmənin digər xəbərləri
