“Mən ətraf mühiti öyrənirəm!” layihəsi başa çatmışdır
Bakı, 24 aprel (AZƏRTAC). Mingəçevir şəhərində yeniyetmələr üçün həyata keçirilən “Mən ətraf mühiti öyrənirəm!” layihəsinə yekun vurulmuşdur.
Layihənin rəhbəri Rəşad Həmidli AZƏRTAC-a bildirmişdir ki, layihə regionlarda fəaliyyət göstərən orta məktəblərin şagirdləri arasında maarifləndirmə işi aparmaqla, onların ətraf mühit haqqında təsəvvürlərinin formalaşmasına nail olmaq məqsədi ilə reallaşmışdır.
Layihə çərçivəsində Mingəçevirin orta məktəb şagirdləri üçün “Mən ətraf mühiti öyrənirəm” adlı “Ekoloji məktəb” təşkil olunmuşdur. “Ekoloji məktəb”də iki ay ərzində həftədə bir gün orta məktəb şagirdləri üçün ekologiya mövzusunda təlimlər, mühazirələr, ekskursiyalar, diskussiyalar və ölkəmizin tanınmış ekologları ilə görüşlər təşkil olunmuşdur.
Şagirdlər arasında “Ətraf mühitimizin vəziyyəti-mənim baxışımda” mövzusunda esse müsabiqəsi keçirilmişdir. Esselər əsasında “Ekoloji məktəb”ə şagirdlər seçilmiş və onlar üçün təlimlər keçirilmişdir. İmtahanları müvəffəqiyyətlə başa vuran şagirdlərə sertifikatlar təqdim olunmuşdur.
Bölmənin digər xəbərləri
