Meşə yanğınlarının qarşısının alınması məqsədilə təlim-məşq keçirilib
Bakı, 28 iyul, AZƏRTAC
Ekologiya və Təbii Sərvətlər Nazirliyinin Fövqəladə Hallar üzrə Tədbirlər Mərkəzi tərəfindən Quba rayonunun Rustov meşəbəyliyində təlim-məşq keçirilib.
Nazirliyin mətbuat xidmətindən AZƏRTAC-a verilən məlumata görə, təlim-məşqdə Quba, Qusar, Yalama və Şabran meşə
mühafizəsi və bərpası müəssisələrinin bu sahə üzrə məsul əməkdaşları iştirak edib. Təlim-məşqin keçirilməsində məqsəd meşələrdə baş verə biləcək fövqəladə ekoloji hadisələrin qarşısının alınması, yanğın təhlükəsizliyi qaydalarına əməl olunması, yanğın baş verən zaman qarşıda duran vəzifələrin yerinə yetirilməsinə hazırlığın yoxlanılması, habelə meşə yanğınları ilə mübarizə üsullarının təkmilləşdirilməsi olub.
Mərkəzin mütəxəssisləri tərəfindən təlim-məşqdə yüksək dağlıq ərazidə baş verə biləcək meşə yanğınlarının söndürülməsində istifadə olunan zəruri texnika, avadanlıq və ləvazimatlardan istifadə qaydaları, o cümlədən meşə yanğınlarının söndürülməsi üsulu, mərkəzə məxsus xüsusi təyinatlı yanğınsöndürən avtomaşın və motopompalar vasitəsilə suyun daha uzaq məsafələrə vurulması, yanğının geniş əraziyə yayılmasının qarşısının alınması, qüvvə və vasitələrin yanğın baş vermiş əraziyə dərhal gətirilməsi və idarə olunması şəxsi heyətə nümayiş etdirilib.
Bölmənin digər xəbərləri
