Milli-mənəvi dəyərlərimiz bir xalq kimi kimliyimizi təsdiqləyən vəsiqəmizdir RƏY
Bakı, 19 fevral, AZƏRTAC
Milli və mənəvi dəyərlər mövzusu qlobal dünyanın əsas aktual məsələlərindən biridir. Ənənəvi cəmiyyətlərdən modern cəmiyyətlərə keçidlə dəyərlər zəifləməyə başladı. Modern cəmiyyətlərdə ənənəvi dəyərlərin mövcudluğunu qoruyub saxlamaq, əlbəttə, çox çətin idi. Əvəzində isə modern cəmiyyətlər üçün modernliyin əsasları sayılan rasional düşüncə, fərdiyyətçilik, sekulyar düşüncə, sənayeləşmə, şəhərləşmə, elm və sair kimi məsələlərdən doğan dəyərlər sistemi ortaya çıxdı.
Bu sözləri AZƏRTAC-a açıqlamasında Mənəvi Dəyərlərin Təbliği Fondunun icraçı direktoru Mehman İsmayılov söyləyib.
Qloballaşmanın dəyərlər mövzusuna baxışı daha da mürəkkəbləşdirdiyini diqqətə çatdıran M.İsmayılov deyib: “Belə ki, qloballaşma özü çoxyönlü prosesdir. Bu proses dəyərlərin qloballaşmasını təmin edə bildiyi kimi, digər tərəfdən də qlobal dəyərlər ortaya qoymağa çalışır. Qloballaşma sayəsində insanlığın ümumbəşəri dəyərlər ətrafında birləşməsi ideyası ortaya atılsa da, zaman keçdikcə bunun reallaşmasında müəyyən problemlərin ortaya çıxdığını gördük. Belə ki, qloballaşma hər şeydən əvvəl "Qərbmərkəzli"dir. Qərbmərkəzli qloballaşma təzahür etdiyi iqtisadi, mədəni, ictimai, siyasi, dini və digər bütün sahələrdə Qərbin diktə etdiyi dəyərlər sistemini ümumbəşəri dəyərlər kimi bütün cəmiyyətlərə təqdim edir. Halbuki Qərbin iqtisadi, siyasi və digər maraqlarının təsirlərinin də olduğu bu dəyərlərin ümumbəşərilik rolunu nə dərəcədə icra edib-etmədiyi mübahisə mövzusudur. Ona görə də bəzi elm adamları dəyərlərin qloballaşması ilə qloballaşmanın dəyərlərini bir-birindən ayırmağın zəruri olduğunu düşünürlər. Çünki hamının ortaq qəbul etdiyi ümumbəşəri dəyərlərin bərqərar olması onların qloballaşması ilə mümkündür. Halbuki qloballaşmanın özü ilə gətirdiyi dəyərlər ümumbəşəri olmaqdan daha çox elə qloballaşmanın vasitəçisi kimi də çıxış edirlər”.
Prezident İlham Əliyevin andiçmə mərasimində milli və mənəvi dəyərlərə vurğusunun da bu baxımdan diqqət çəkdiyini deyən Mehman İsmayılov əlavə edib: “Çıxışda gənc nəslin milli-mənəvi dəyərlərə bağlı yetişdirilməsi, ailənin qorunması, məktəblərin tərbiyəvi rolu, milli birliyin qorunması, azərbaycançılıq ideologiyası kimi mühüm məqamlara toxunan Azərbaycan Prezidenti ölkəmizin dünyada layiqli yer tutması ilə yanaşı, cəmiyyətin də yad mənfi təsirlərdən qorunmasının vacibliyini diqqətə çatdırdı və bu istiqamətdə atılacaq addımların əhəmiyyətindən danışdı. Dövlətimizin başçısının fikirlərini ümumi dəyərləndirdikdə belə nəticəyə gəlirik ki, biz müasir dünyaya inteqrasiya edən, müasir dünya mədəniyyətinə yönələn bir ölkəyik. Milli maraqlarımız çərçivəsində dünyada baş verən proseslərdən kənar qala bilmərik. Lakin bununla yanaşı, kimliyimizi və bu kimliyi formalaşdıran dəyərləri qoruyub saxlamaq bizim əsas istiqamətlərimizdən biridir. Tarixi təcrübə göstərir ki, öz soykökündən, tarixindən, milli-mənəvi dəyərlərindən uzaq düşən millətlər və dövlətlər müəyyən zaman kəsiyində yox olmaq, tarix səhnəsindən silinmək təhlükəsi ilə üzləşiblər. Milli-mənəvi dəyərlərimiz bir xalq kimi kimliyimizi təsdiqləyən vəsiqəmizdir. Bir xalqın və ya ölkənin digər millətlər arasındakı yeri həm də onun milli-mənəvi dəyərlərini nə dərəcədə yaşatması ilə ölçülür. Dəyərlərimizi qorumaq kimliyimizi qorumaq, onları təbliğ etmək isə mədəniyyətimizin təbliği deməkdir. Öz ənənə və dəyərlərini qoruyaraq müasir dünyaya inteqrasiya edən ölkəmiz üçün bu siyasət mühüm əhəmiyyət kəsb edir. Müasir dünyada kimliklərin, mədəniyyətlərin və dəyərlərin təbliği və tanıdılması üçün imkanlar daha genişdir və biz bu imkanlardan maksimum istifadə etməliyik”.
Bölmənin digər xəbərləri
