Millinin baş məşqçisi: Azərbaycan boksunun 100 illik yubileyinə öz töhfəmizi vermək istəyirik
Bakı, 19 yanvar, AZƏRTAC
“Komandamız hazırlıqlarını ABŞ-ın Kolorado ştatında davam etdirir. Bakıda fiziki məşqlərdən sonra burada texniki-taktiki məşqlər üzərində işləyirik və toplanış yüksək səviyyədə keçir. Boksçularda əhvali-ruhiyyə əladır”.
AZƏRTAC xəbər verir ki, bu sözləri kişi boksçulardan ibarət milli komandanın baş məşqçisi Pedro Roke Azərbaycan Boks Federasiyasının rəsmi saytına açıqlamasında deyib.
Təcrübəli mütəxəssis yığmanın hazırkı durumunu dəyərləndirib, “Paris-2024” Yay Olimpiya Oyunlarına hazırlıq planını açıqlayıb və Azərbaycan boksunun 100 illik yubileyində tarixi uğur qazanmaq arzusunda olduğunu bildirib.
P. Rokenin sözlərinə görə, ABŞ-ın Kolorado ştatında Olimpiya çəki dərəcələri üzrə təlim-məşq toplanışı plan üzrə gedir və fevralın 1-dək davam edəcək hazırlıq yığma üçün çox faydalı olacaq: “Boksçularımızın durumu çox yüksək səviyyədədir və hər birindən razıyam. Bütün hazırlıqlar plan üzrə davam edir. Məqsəd Olimpiya təsnifat turnirlərinə kimi pik nöqtəyə çatmaq və yaxşı nəticələr əldə etməkdir. İstəyirik ki, daha bir neçə lisenziya qazanaq. Toplanışda ABŞ yığması ilə yanaşı, İngiltərə millisi də iştirak edir. Bir çox dünya çempionu, olimpiya mükafatçısı da bizimlə hazırlıq keçir. Birgə toplanış inkişaf baxımından boksçularımızın xeyrinə olacaq. Bir sözlə, lisenziya turnirləri öncəsi çox gözəl imkandır. ABŞ və İngiltərə komandaları ilə 3-4 sınaq döyüşləri də planlaşdırırıq”.
O, Olimpiya ilində uğur qazanacaqlarına inam ifadə edib: “Gözləntilərimiz müsbətdir. Hələlik 2 lisenziya qazanmışıq və məqsədimiz azı daha 3 vəsiqəyə sahib olmaq, Azərbaycan boksuna yüksək nəticələrlə töhfə verməkdir. Bu il də ölkəmizi layiqincə təmsil edəcəyimizə inanıram. Qarşıda bizi İtaliya və Tailandda 2 təsnifat turniri gözləyir. 7 lisenziyadan ən azı 5-nə sahib olmaq üçün boksçularımız öz şanslarını yoxlayacaqlar”.
Baş məşqçi kimi yığmada bir neçə rekorda sahib olan kubalı mütəxəssis hədəfinin Azərbaycan boksunun 100 illik yubileyində “Paris-2024” Yay Olimpiya Oyunlarından qızıl medalla qayıtmaq olduğunu vurğulayıb: “Bu il boks ailəmiz üçün əlamətdardır. Azərbaycan boksunun 100 illik yubileyinə biz də öz töhfəmizi vermək istəyirik. Daim əzmlə çalışırıq ki, yubiley və Olimpiya ilində Azərbaycan boksuna bir ilk yaşadaq, Olimpiadada himnimizi səsləndirək və Bakıya qızıl medalla qayıdaq. Rio Olimpiadasında buna çox yaxın olduq. Amma təəssüf ki, çempionluğun bir addımlığında dayandıq. Bu il isə buna çox inanıram. Çünki federasiya, ölkə və xalq bizə çox böyük ümid bəsləyir. Çalışacağıq ki, onların güvənini boşa çıxarmayaq və yubileyə xüsusi hədiyyə ilə gələk”.
P. Roke artıq lisenziya qazanan Murad Allahverdiyev (80 kiloqram) və Məhəmməd Abdullayevə (+92 kiloqram) xüsusi proqramla hazırlıq keçməyə başladıqlarını da deyib. O bildirib ki, olimpiyaçılar ABŞ toplanışında xüsusi diqqətdədirlər: “Onlar da bizimlə Koloradoda təlim-məşq toplanışındadır. Nəzarətim altında xüsusi proqramla işləməyə başlamışıq. “Paris-2024” Yay Olimpiya Oyunlarının startınadək hər şeyin yüksək səviyyədə olacağına inanırıq. Toplanışda hələlik əsas diqqətimiz lisenziya əldə etmədiyimiz digər 5 çəki dərəcəsində də vəsiqələrin qazanılması üçün ən yaxşı formanı yığmağa yönəlib”.
Qeyd edək ki, lisenziya xarakterli I Dünya Təsnifat Turniri martın 4-11-də Busto Arsizioda (İtaliya), II Dünya Təsnifat Turniri mayın 26-dan iyunun 2-dək Banqkokda olacaq. “Paris-2024” Yay Olimpiya oyunları isə iyulun 26-dan avqustun 11-dək keçiriləcək.
Bölmənin digər xəbərləri
