Mingəçevirdə su və kanalizasiya təchizatının yaxşılaşdırılmasına dair işlər görülür
Bakı, 21 avqust, AZƏRTAC
“Regionların sosial-iqtisadi inkişafı Dövlət proqramı”na uyğun olaraq İri Şəhərlərin Birləşmiş Su təchizatı Xidməti Mingəçevir şəhərində əhalinin dayanıqlı və keyfiyyətli içməli su ilə təminatı, kanalizasiya şəbəkə və qurğularının yenidən qurulması işləri həyata keçirir.
AZƏRTAC xəbər verir ki, İri Şəhərlərin Birləşmiş Su Təchizatı Xidmətinin mətbuat katibi Ceyhun Musaoğlu Mingəçevir şəhər Sukanal İdarəsi tərəfindən əhalinin içməli su ilə təmin edildiyini, tullantı sularının sutəmizləyici qurğulara ötürüldüyünü, yağış sularının idarə olunması işlərinin həyata keçirildiyini, o cümlədən qanunsuz birləşmələrə qarşı mübarizə aparıldığını bildirib:
“Texniki şərt əsasında abonent qoşulmaları həyata keçirilir, tullantı su, o cümlədən su şəbəkəsində baş verən hər hansı bir qəzanın aradan qaldırılması işləri görülür. Xətlərin yenilənməsi, yeni xətlərin çəkilməsi də Mingəçevir şəhər Sukanal İdarəsinin gördüyü işlərə aiddir”.
İdarə əhali qrupu üzrə 31978 və qeyri-əhali qrupu üzrə 1598 olmaqla, ümumilikdə 33576 abonentə xidmət göstərir. Abonentlərin sayğaclaşma səviyyəsi 97 faiz təşkil edir.
Məhsuldarlığı sutkada 55 min kub metr olan müasir sutəmizləyici qurğu və tutumu 10 min kub metr olan mərkəzi su anbarı tikilərək istismara verilib.
Qeyd olunub ki, şəhəri içməli su ilə təmin etmək üçün xam su Mingəçevir Su Anbarından diametri 800 millimetr olan boru xətti ilə sutəmizləyici qurğuya verilir. Sutəmizləyici qurğuda su 28 ədəd qum süzgəcindən keçərək asılı hissəciklərdən təmizlənir və maye xlorla zərərsizləşdirilir. Emal olunmuş su qurğunun nasos stansiyasında quraşdırılmış 200 kilovatlıq 3 ədəd nasos aqreqatı vasitəsilə diametri 820 millimetr olan boru ilə mərkəzi su anbarına ötürülür.
Mingəçevir şəhər Sukanal İdarəsinin sahə rəisi Elçin Salmanov Mingəçevir şəhər Sutəmizləyici Qurğular Kompleksi haqqında məlumat verərək deyib ki, gün ərzində saatda 2500 kub su təmizlənib mərkəzi su anbarına ötürülür: “Su anbardan diametri 1000 millimetrlik boru ilə şəhərə özaxımı vasitəsilə ötürülür. Mingəçevir şəhər Sutəmizləyici Qurğular Kompleksində laboratoriyamız yerləşir. Laboratoriya gün ərzində suyun tərkibini nəzarətdə saxlayır”.
Ceyhun Musaoğlu diqqətə çatdırıb ki, Mingəçevir Su Anbarından sutəmizləyici qurğulara daxil olan su orada təmizlənərək +82 Su Anbarına daxil olur: “Ümumiyyətlə, Mingəçevir şəhəri üzrə su şəbəkəsinin uzunluğu 340 kilometrdir. Magistral xətlər 41 kilometr təşkil edir. Küçə və məhəllə daxili xətlər isə 299 kilometrdir. Şəhərə özaxımı ilə verilən su minlik xətlə ötürülür və 5,5 kilovatlıq 2 nasos da fəaliyyət göstərir. Dövlət Proqramı ilə 210 kilometrlik xətt çəkilib. 3 kanalizasiya stansiyası tikilib. Layihədə Çirkab Sutəmizləyici Qurğusunun tikilməsi nəzərdə tutulur ki, bununla bağlı da işlərə başlanılıb. 2 ədəd məhəllə daxili sutəmizləyici qurğu, 8 ədəd kanalizasiya nasos stansiyası var. Bütün bu işlər Mingəçevir şəhər Sukanal İdarəsi tərəfindən həyata keçirilir. 24 saat içməli su ilə şəhər təmin olunur”.
Şəhərin kanalizasiya şəbəkəsinin ümumi uzunluğu 316,6 kilometrdir. O cümlədən, magistral boru xətlərinin uzunluğu 62,5 kilometr, küçə və məhəllə daxili boru xətlərinin uzunluğu 254,1 kilometrdir. İdarənin istismarında 2 məhəllə daxili tullantı su təmizləyici qurğu və 8 kanalizasiya nasos stansiyası var.
Layihədə, həmçinin Xaldan şosesinin yaxınlığında sutkalıq gücü 65000 kubmetr olan yeni Çirkab Sutəmizləyici qurğusunun tikilməsi nəzərdə tutulub. Şəhər ərazisində texniki şərtə uyğun olaraq yeni qoşulmalar müntəzəm həyata keçirilir.
Mingəçevir şəhər Sukanal İdarəsinin sahə ustası Elnur Ələkbərovun sözlərinə görə, Heydər Əliyev prospektində vətəndaşın texniki şərtə uyğun müraciətinə əsasən, 63 millimetrlik borudan abonentə 32 millimetrlik boruya çıxış verilir: “İşlər bitdikdən sonra bu ünvan 24 saat fasiləsiz su ilə təmin olunacaq”.
Bildirilib ki, Mingəçevir şəhər Sukanal idarəsinin həllinə çalışdığı əsas problem su itkilərinin qarşısının alınmasıdır. Cari yarım ilin nəticələrinə görə, idarə üzrə su itkisi 54,5 faiz olub. Bəzi abonentlər ikili xətlərdən istifadə edirlər. Son üç ayda belə qanunsuz xətlərlə bağlı 94 cərimə aktı tərtib edilib. Şəhər ərazisində ictimai əsaslarla inşa edilmiş 273 bulaq idarə tərəfindən fasiləsiz su verilir. Digər bir məsələ debitor borclarla bağlıdır. Göstərilmiş xidmətlərə görə ödənişlərin təmin edilməsi üçün idarə tərəfindən gündəlik reydlər keçirilir. Su borcu çox olan abonentlərin su təminatı dayandırılır. Ödəniş edildikdən sonra təminat bərpa edilir. Eyni zamanda, suyun israf edilməməsi, ödənişlərin vaxtlı-vaxtında edilməsi barədə əhali arasında maarifləndirici xarakterli söhbətlər aparılır.
Qeyd olunub ki, bir ünvanda sayğacdan keçməyən diametri 20 millimetr su xətti aşkar olunub. Xətt sayğacdan keçmədən evi su ilə təchiz edir. Bu pozuntu abonent şöbəsinin əməkdaşları tərəfindən ləğv olunub, cərimə aktı yazılıb.
Ceyhun Musaoğlu son olaraq bildirib ki, xüsusən qızmar yay aylarında su itkisinin qarşısını almaq abonentlərin fasiləsiz su ilə təminatında əsas rol oynayır: “Çox təəssüf ki, şəhər ərazisində qeyri-qanuni qoşulmalar da var. Gəlin, suyumuzu qoruyaq, suyumuzun qayğısına qalaq, suyumuzu indi elə istifadə edək ki, gələcək nəsillərə ötürə bilək”.
Bölmənin digər xəbərləri
