MOLDOVA PREZİDENTİ VLADİMİR VORONİNİN BƏYANATI
-Hörmətli İlham Heydər oğlu!
Əziz dostlar!
Biz bu səfər barədə dəvəti məmnunluq və razılıqla qəbul etdik. Mən Prezident olduğum müddətdə artıq ikinci dəfədir ki, sizin ölkəyə rəsmi səfər edirəm. Bəri başdan demək istəyirəm ki, sizin paytaxtınızda - Bakı şəhərində gedən yenidənqurma və tikinti işlərinin vüsəti məni sadəcə olaraq heyran etmişdir. Hətta əvvəlcə fikirləşdim ki, deyəsən, başqa şəhərə gəlmişəm. Bu uğurlar məni çox sevindirir. Azərbaycan Prezidenti ilə söhbət zamanı, onunla fikir mübadiləsi edərkən başa düşdüm ki, indi bu cür yenidənqurma, modernləşmə prosesi bütün ölkədə gedir. Bu məni daha çox sevindirdi.
Bizim ortaq tariximiz, bir ölkədə yaşadığımız vaxtlar olmuşdur, biz Sovet İttifaqı xalqlarının qardaşlıq ailəsində birgə inkişaf etmişik, müstəqil, suveren dövlətlər kimi inkişafın yeni mərhələsinin başlanğıcı da bizim üçün ümumi tarixdir. Bu mərhələdə biz çox şeyləri yenidən dərk etməliyik, görülməli işlər olduqca çoxdur. Lakin son bir neçə ildə Azərbaycanın necə sürətlə inkişaf etməsini, Prezident İlham Əliyevin problemlərə münasibətini, onun xalqın həyat səviyyəsini yaxşılaşdırmaq üçün qarşıya qoyduğu məqsədləri nəzərə alaraq düşünürəm ki, siz lap yaxın vaxtlarda dünyanın ən inkişaf etmiş dövlətləri səviyyəsinə çatacaqsınız. İlham Heydər oğlu, mən buna ürəkdən sevinirəm və bu məqsədlərin, bu vəzifələrin həyata keçirilməsində Sizə uğurlar arzulayıram.
Azərbaycan Prezidentinin dediyi kimi, ölkələrimiz arasında münasibətlər həqiqətən dinamik şəkildə, yüksələn xətt üzrə inkişaf edir. Bizim ticarət-iqtisadi sahədə, investisiya siyasətində, ölkələrimizin mövcud resurslarının birgə mənimsənilməsində qarşılıqlı əlaqələrimizi keyfiyyətcə yeni səviyyəyə çatdırmağa imkan verən çox sanballı ikitərəfli müqavilələr və sazişlər paketimiz var. Bu gün Azərbaycan Prezidenti ilə bu barədə danışmışıq. Fikrimcə, bu layihələrin həyata keçirilməsi ölkələrimizin bir-birinə daha çox yaxınlaşmasına, dostluq tellərini, qərarlaşmış tarixi münasibətlərimizi daha da möhkəmləndirməyə imkan verəcəkdir.
Sizin artıq qeyd etdiyiniz kimi, biz sizinlə Avropanın müxtəlif qurumları çərçivəsində, Birləşmiş Millətlər Təşkilatında qarşılıqlı əlaqədə fəaliyyət göstəririk. Biz MDB çərçivəsində fəaliyyətə böyük töhfə veririk və burada hər dəfə Azərbaycanın güclü səsini eşidirik. Biz bir sıra məsələləri bir-birimizlə razılaşdırırıq, birgə inkişaf məsələlərində MDB üzrə o biri həmkarlarımızın dəstəyini hiss edirik.
İkitərəfli münasibətlər məsələsinə qayıdaraq demək istəyirəm ki, biz, əlbəttə, sizin ölkənizə daha çox yaxınlaşmaq, bir çox perspektivli layihələrdə iştirak etmək istəyirik. Bu gün biz məsafələrin qət edilməsinin ən sürətli üsulu olan aviasiya məsələsini də müzakirə etmişik. Zənnimcə, Kişinyov ilə Bakı arasında hava xətti açsaq, bu, düzgün addım olar. Bir çox başqa məsələləri, o cümlədən nümayəndə heyətlərimizin üzvləri, bizim nazirlər tərəfindən imzalanacaq sazişləri də müzakirə etmişik. Onlar ən geci bir aydan - ay yarımdan sonra bizim iqtisadiyyatların gələcək inteqrasiyası ilə bağlı məsələlərin reallaşdırılması üzrə hökumətlərarası komissiyanın tamformatlı iclasının hazırlanması və keçirilməsi üçün öz aralarında razılığa gələcək və müvafiq məsələləri ikitərəfli səviyyədə həll edəcəklər.
Sizdə sosial proqramların həyata keçirilməsi, məktəblərin inkişafı barədə eşitdiklərimiz də bizə güclü təsir bağışladı. Özü də təkcə onların inkişafından deyil, internetin və digər qabaqcıl texnologiyaların köməyi ilə ən müasir tədris proseslərinə inteqrasiyadan söhbət gedir. Sizin infrastruktur təminatı məsələlərini çox ciddi həll etməyiniz bizə güclü təsir bağışladı. Ölkəniz başdan-başa qazlaşdırılmışdır, su təchizatı məsələləri ciddi surətdə həll edilir. Mən bunları ona görə təkrar edirəm ki, bizim də bu sahədə çətinliklərimiz var və onları aradan qaldırmaq istəyirik.
Əlbəttə, ola bilər ki, həmin çətinlikləri aradan qaldırmağa imkanımız yoxdur, lakin biz bunda çox israrlıyıq. Buna görə də ümid edirik ki, fikir mübadiləsi nəticəsində, qarşılıqlı surətdə razılaşdırılmış müəyyən investisiya proqramlarının həyata keçirilməsi nəticəsində biz sizin köməyinizlə bu çətinlikləri daha tez aradan qaldıra, bu məsələləri həll edə bilərik.
İlham Heydər oğlu, mən söhbətlərimizdən razıyam və istərdim ki, işinizin çoxluğuna, Azərbaycanın Prezidenti kimi qarşınızda duran problemlərin çox olmasına baxmayaraq, Siz imkan tapıb Moldovaya səfər edəsiniz. Orada da müəyyən dəyişikliklər baş vermisdir, ola bilsin ki, sizdəki qədər əsaslı olmasa da, bəzi şeylər dəyişir, özü də yaxşılığa doğru dəyişir. Biz bütün bunları Sizə göstərmək imkanından şad olardıq.
Bölmənin digər xəbərləri
