DÜNYA
MOLDOVADA YETKİNLİK YAŞINA ÇATMAYAN UŞAQLARA DA PASPORT VERİLƏCƏK
AZƏRTAC-ın Kişinyovdan aldığı xəbərə görə, Moldovanın yetkinlik yaşına çatmayan vətəndaşları indən belə dövlət sərhədini ancaq pasportla keçə biləcəklər.
Ölkə ərazisini isə onlar yalnız valideynlərinin, qəyyumlarının, yaxud notarius tərəfindən təsdiq edilmiş etibarnaməsi olan şəxslərin müşayiəti ilə tərk edə bilərlər. Parlamentdə belə bir qanun uşaqların ölkədən qanunsuz çıxarılmasına qarşı mübarizə məqsədi ilə qəbul edilmişdir. Beynəlxalq Əmək Təşkilatının bu yaxınlarda yayılmış məruzəsində deyilir ki, cinayətkarlar hər il Moldovadan 5 minə yaxın uşaq çıxarır, onların da bir çoxunu fahişəliklə məşğul olmağa məcbur edirlər.