Moldovalı deputat: Heydər Əliyevin sarsılmaz iradəsi ilə suveren Azərbaycanın əsasları qoyuldu
Kişineu, 11 may, AZƏRTAC
Moldovanın paytaxtı Kişineu şəhərində Ümummilli Lider Heydər Əliyevin anadan olmasının 102-ci ildönümünə həsr edilmiş anım tədbiri keçirilib.
AZƏRTAC xəbər verir ki, anım tədbirində Azərbaycanın Kişineudakı səfirliyinin, Moldovadakı Azərbaycanlılar Konqresinin (MAK) rəhbərliyi, Moldova Parlamentinin deputatları, xarici diplomatik korpusların rəhbərləri, yerli ictimai-siyasi xadimlər, diaspor fəalları iştirak ediblər. Tədbir iştirakçıları əvvəlcə Ulu Öndərin abidəsi önünə tər çiçəklər düzüb, əziz xatirəsini anıblar.
Sonra səfirlikdə keçirilən tədbirdə çıxış edən ölkəmizin Moldovadakı səfiri Ülvi Baxşəliyev görkəmli dövlət xadimi, Ümummilli Lider Heydər Əliyevin həyat və fəaliyyəti, Azərbaycan xalqının müasir dövlətçilik tarixinin formalaşmasında və inkişafında misilsiz rolu və xidmətləri haqqında ətraflı məlumat verib. Səfir bildirib ki, Ulu Öndər Heydər Əliyev Azərbaycan və Moldova münasibətlərinin memarıdır.
“Ümummilli Liderin bizə qoyub getdiyi güclü Azərbaycan bu gün onun layiqli davamçısı Prezident İlham Əliyevin uğurlu, düşünülmüş siyasəti nəticəsində daha da güclənir, dünyada söz sahibinə çevrilir. Məhz ona görə də, Müzəffər Ali Baş Komandan İlham Əliyevin rəhbərliyi ilə Azərbaycan Ordusu ərazilərimizi işğaldan azad edib. Ümummilli Liderin ideyalarının layiqli davamçısı Prezident İlham Əliyevin rəhbərliyi ilə ərazi bütövlüyünü tam bərpa edən Azərbaycan sürətlə inkişaf edir”, deyə səfir vurğulayıb.
Tədbirdə iştirak edən Moldova Respublikası Parlamentinin deputatı, Azərbaycanla Dostluq Qrupunun sədri Vitali Yakot bildirib ki, Heydər Əliyev həyat və yaradıcılığı böyük dövlət xadiminin, uzaqgörən rəhbərliyin bütöv bir xalqı necə dəyişdirə biləcəyinin parlaq nümunəsidir.
“Heydər Əliyevin sarsılmaz iradəsi və dərin ağılı sayəsində müasir, güclü və suveren Azərbaycanın əsasları qoyuldu. Heydər Əliyev təkcə siyasətçi deyil, həm də ölkənin rifah və sabitliyi yolunda sınaqlardan və çətinliklərdən keçərək rəhbərlik etdiyi strateq idi. Onun qətiyyətli fəaliyyəti və müdrik qərarları sayəsində Azərbaycan dünya miqyasında layiqli yerini tutan çiçəklənən dövlətə çevrilib. Heydər Əliyevin müdrik və uzaqgörən rəhbərliyi ilə Azərbaycan öz dövlətçiliyinə, parlamentinə, Konstitusiyasına qovuşdu, müxtəlif mülkiyyət formalarına əsaslanan yeni ictimai münasibətlər sistemi qurmağa, bazar iqtisadiyyatını inkişaf etdirməyə, enerji sektorunu inkişaf etdirməyə başladı. Bu, əlbəttə ki, asan yol deyildi, eyni zamanda, irəliyə doğru böyük bir addım idi. Prioritet istiqamət dünya sivilizasiyasının dəyərlərinə əsaslanan hüquqi, dünyəvi, demokratik dövlət quruculuğu oldu”, - deyə moldovalı deputat qeyd edib.
Moldova Azərbaycanlıları Konqresinin sədri Elçin Bayramov isə çıxışında bildirib ki, Heydər Əliyev milli birlik və tərəqqi rəmzi idi.
“Ulu Öndərin irsi bu gün də öz aktuallığını qoruyub saxlayır, bizi özümüzdən daha yaxşı olmağa ruhlandırmaqda davam edir. Heydər Əliyevin doğum günü Azərbaycan xalqı üçün mühüm tarixdir. Onun qeyd olunması ölkənin inkişafına və beynəlxalq nüfuzunun möhkəmləndirilməsinə verdiyi töhfəyə hörmətin simvoludur. Bu tarixə həsr olunmuş tədbirlər Azərbaycan diasporunun fəal olduğu bir çox ölkələrdə hər il keçirilir və xaricdə nəsillər arasında əlaqəni gücləndirmək və mədəni kimliyi qoruyub saxlamaq üçün fürsətə çevrilir”, - deyə diaspor rəhbəri vurğulayıb.
Tədbirdən sonra Ümummilli Liderin həyat və yaradıcılığına həsr olunan sərgiyə baxış keçirilib.
Moldovadakı Azərbaycan diasporunun nümayəndəsi, istedadlı skripka ifaçısı Rəşad Sadıqovun bayram əhvali-ruhiyyəsini daşıyan parçalarla çıxışı tədbir proqramının musiqili hissəsini daha da gözəlləşdirib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
