DÜNYA
M.SAAKAŞVİLİ GÜRCÜSTAN MƏKTƏBLƏRİNDƏ TÜRK DİLİNİ ÖYRƏTMƏK ÜÇÜN TÜRKİYƏDƏN MÜƏLLİMLƏR GÖNDƏRİLMƏSİNİ XAHİŞ EDİR
AZƏRTAC-ın Ankaradan aldığı xəbərdə bildirilir ki, Türkiyənin Baş naziri Rəcəb Tayyib Ərdoğan burada səfərdə olan Gürcüstan Prezidenti Mixail Saakaşvili ilə görüşmüşdür. İstanbulda keçirilən görüşdə Gürcüstan lideri bəyan etmişdir ki, Acarıstanın muxtar respublika kimi statusu müzakirə olunmamalıdır.
Tayyib Ərdoğan müsahibini əmin etmişdir ki, Türkiyə Gürcüstanın NATO-ya qəbul olunmasına hər vasitə ilə kömək göstərəcəkdir. O, Gürcüstan və Türkiyə arasında Tbilisi-Qars marşrutu ilə dəmir yolu çəkilməsi layihəsini həyata keçirməyin vacibliyini vurğulamışdır. Baş nazir demişdir ki, bu yol tez bir zamanda açılmalı, sonra isə Xəzər dənizinədək uzanmalıdır.
M.Saakaşvili Türkiyə hökumətini ölkə biznesmenlərinin Gürcüstan iqtisadiyyatına sərmayə qoymasında yardımçı olmağa çağırmışdır. O, Gürcüstan ordusu bölmələrinin hazırlığında Türkiyənin səmərəli yardımına görə Ərdoğana təşəkkürünü bildirmiş və öz ölkəsinin məktəblərində türk dilini öyrətmək üçün müəllimlər göndərilməsini xahiş etmişdir.