Yunanıstan süni intellekt sahəsində ABŞ nəhəngləri ilə danışıqlar aparıb
Afina, 22 sentyabr, AZƏRTAC
Yunanıstanın Baş naziri Kiriakos Mitsotakis ABŞ-yə səfəri çərçivəsində “Nvidia” və “Sequoia Capital” şirkətlərinin rəhbər şəxsləri ilə görüşərək süni intellekt, rəqəmsal infrastruktur və innovativ sahibkarlıq sahələrində əməkdaşlıq imkanlarını müzakirə edib.
AZƏRTAC xəbər verir ki, Yunanıstanın “Kathimerini” nəşrinin məlumatına görə, Silikon Vadisində keçirilən görüşlərdə ölkəyə texnoloji investisiyaların cəlb edilməsi və yerli startap ekosisteminin inkişafı əsas mövzular sırasında olub.
“Nvidia” şirkətində aparılan danışıqlarda yüksəkməhsuldarlıqlı hesablama infrastrukturu və süni intellekt texnologiyalarının iqtisadiyyatın müxtəlif sahələrində tətbiqi imkanları nəzərdən keçirilib. Tərəflər bu texnologiyaların dövlət qurumlarının, müəssisələrin və innovativ şirkətlərin fəaliyyətində istifadəsi ilə bağlı fikir mübadiləsi aparıblar.
Baş nazir “Sequoia Capital”ın nümayəndələri ilə görüşdə isə Yunanıstanın innovasiya mühitini və texnologiya sahəsində investisiya imkanlarını təqdim edib. Müzakirələrdə süni intellektin səhiyyə, təhsil və avtomatlaşdırma kimi istiqamətlərdə tətbiqi, eləcə də yeni texnologiya şirkətlərinin inkişafı məsələlərinə toxunulub.
Yunanıstan hökuməti beynəlxalq texnologiya şirkətləri və investisiya fondları ilə əlaqələri genişləndirməklə ölkənin rəqəmsal iqtisadiyyatının inkişafını sürətləndirməyi hədəfləyir. Baş nazirin ABŞ-yə səfərinin proqramına texnologiya sektoru ilə yanaşı, beynəlxalq investorlarla görüşlər də daxildir.
Görüşlərin yekununda konkret investisiya müqaviləsinin imzalanması və ya yeni layihələr üçün maliyyə vəsaitinin ayrılması barədə məlumat verilməyib.
Bölmənin digər xəbərləri
