MÜHAZİRƏ BERLİNDƏKİ ERMƏNİ DİASPORUNUN NARAHATLIĞINA SƏBƏB OLMUŞDUR
Bakı, 24 sentyabr (AZƏRTAC). Xəbər verdiyimiz kimi, sentyabrın 21-də Berlində Almaniyadakı Azərbaycanlıların Koordinasiya Mərkəzinin (AAKM) ofisində Bundestaqın elmi işçisi, siyasi elmlər üzrə mütəxəssis Hayko Langner „Geopolitik təsir və gərginləşən təhlükəsizlik mühitində Dağlıq Qarabağ münaqişəsi“ adlı mühazirə təqdim etmişdir. Tədbiri təşkil edən AAKM-in icraçı direktoru Samirə Patzer-İsmayılovanın AZƏRTAC-a verdiyi xəbərə görə, Hayko Lanqner öz məruzəsində Qarabağ mühaqibəsi ilə bağlı mühüm məqamlara yer ayırmışdır. Siyasətçi qeyd etmişdir ki, 1994-cü ildə münaqişə tərəfləri arasında atəşkəs haqqında anlaşma əldə olunduğu zamandan bəri ATƏT-in Minsk qrupu Dağlıq Qarabağ münaqişəsinin sülh yolu ilə tənzimlənməsində vasitəçilik etməyə çalışır. Münaqişə tərəfləri isə öz başlanğıc mövqeyinden dönməmişlər: Azərbaycan tərəfi dövlətin suverenliyini, ərazi bütövlüyünü tənzimləyən beynəlxalq qanunvericiliyə istinad edir, işğal olumuş torpaqlarının qeyd-şərtsiz geri qaytarilmasını tələb edir, Ermənistan isə zəbt etdiyi ərazilərdən geri çəkilmir, Dağlıq Qarabağda qondarma „dövlət“ yaradaraq, üstəlik münaqişənin həllində Dağlıq Qarabağın erməni icmasının „tərəf“ kimi qəbul olunmasını istəyir.
„ATƏT-in Minsk qrupunun göstərdiyi səylərə baxmayaraq, münaqişənin qısa zamanda həll ediləcəyi ehtimalı azdır“ deyən Hayko Lanqner əlavə edərək demişdir ki, əksinə, son vaxtlar Qarabağ cəbhəsində atəşkəsin pozulması halları intensiv xarakter almışdır və bunun da yeni silahlı münaqişəyə çevrilməsi qorxusu getdikcə artır. Məruzəçi həmçinin regionda geosiyasi maraqları olan ATƏT-in Minsk qrupundakı dövlətlərin münaqişənin həlli üçün vacib olan addımları atmamasına səbəb olan amillər, niyə məhz bu dövlətlərin münaqişənin həllinə təsir göstərə bilməsi imkanları, habelə hələ də həllini tapmamış və dondurulmuş vəziyyətin zəbt olunmuş torpaqların humanitar və iqtisadi duruma təsiri və digər məsələlərdən danışmışdır.
Tədbirin davamında Hayko Lanqner işğal edilmiş Azərbaycan ərazilərindən alman jurnalistlərinin 2010-cu ildə çəkdiyi və Şuşa, Laçın, Xankəndi, Ağdam, Əsgəran bölgələrindəki erməni vəhşiliklərini əks etdirən fotoları nümayiş etdirmişdir.
Tədbirdə 1990-cı illərdə Almaniyanın ATƏT-in Minsk qrupunda nümayəndəsi olmuş Dr. Frank Lambax, Bundestaqın elmi işçisi xanım İvon Bexlayn, Azərbaycanın Almaniyadakı səfirliyinin əməkdaşları, dramaturq, jurnalist Lutz Layxtfus, doktorant və tələbələr, Azərbaycan və türk diaspor təşkilatlarının təmsilçiləri iştirak etmişlər. Məruzədən sonra mövzu ətrafında fikir mübadiləsi aparılmışdır.
Məhz bu mövzuda tədbirin keçirilməsi Berlindəki erməni diasporunun nümayəndələrinin narahatlığına səbəb olmuşdur. Qeyd edək ki, Hayko Langner şimal-şərqi Avropa, Rusiya, Türkiyə, Qafqaz regionu üzrə mütəxəssisdir, bu bölgələrdəki proseslərə dair çoxlu məqalənin müəllifidir. 2009-cu ildə “Şərqi Qafqaz, Dağlıq Qarabağ, Abxaziya, Şərqi Osetiya-identitet, xalq hüquqları, geostrateji maraqlar mühitində” adlı kitabı nəşr olunmuşdur.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
