Murmanskda Azərbaycanın Dövlət Müstəqilliyi Günü qeyd edilmişdir
Bakı, 19 oktyabr (AZƏRTAC). Murmanskda Ümumrusiya Azərbaycanlılar Konqresinin (ÜAK) regional bölməsində Azərbaycan Respublikasının Dövlət Müstəqilliyi Gününə həsr edilmiş təntənəli iclas keçirilmişdir.
Əvvəlcə ÜAK-ın Murmansk regional bölməsinin sədri, Murmansk vilayət İctimai Palatasının üzvü Afil Hüseynov tədbir iştirakçılarını salamlamışdır.
O bildirmişdir ki, Azərbaycanın dövlət müstəqilliyinin bərpa edilməsindən 22 il keçir. 1991-ci il oktyabrın 18-də “Azərbaycanın Dövlət Müstəqilliyi haqqında” Konstitusiya Aktının qəbul edilməsi ilə Azərbaycan tarixində yeni era başlanmışdır.
A.Hüseynov qeyd etmişdir ki, Azərbaycanın müstəqillik yolu çox çətin olmuş, bu yolda canlarından keçənlər də olmuşdur.
1988-1990-cı illərdə Azərbaycanda ölkənin müstəqilliyinin bərpa edilməsi uğrunda milli demokratik hərəkat inkişaf etmiş və möhkəmlənmişdir. Keçmiş Sovet İttifaqının rəhbərliyi bu hərəkatı boğmaq məqsədi ilə 1990-cı il yanvarın 20-də sovet ordusu bölmələrini Azərbaycanın paytaxtı Bakı şəhərinin yeritmişdir. Xüsusi qəddarlıqla həyata keçirilən repressiya tədbirləri nəticəsində Bakının yüzlərlə dinc sakini həlak olmuşdur.
Ölkədə elan edilmiş fövqəladə vəziyyət 1991-ci ilin ortalarına qədər davam etmişdir. Azərbaycan xalqının müstəqillik uğrunda israrlı mübarizəsi Azərbaycan Respublikası Ali Sovetinin Azərbaycan Respublikasının dövlət müstəqilliyi haqqında bəyannamə qəbul etməsi ilə nəticələnmişdir. 1991-ci il oktyabrın 18-də Azərbaycan Ali Sovetinin tarixi sessiyasında “Dövlət müstəqilliyi haqqında” Konstitusiya Aktı yekdilliklə qəbul edilmişdir.
1991-ci il dekabrın 29-da Azərbaycanda ümumxalq səsverməsi keçirilmiş, Azərbaycan xalqı yekdilliklə dövlət müstəqilliyinə səs vermişdir.
ÜAK-ın regional bölməsinin idarə heyətinin üzvü, sahibkar Qədir Hüseynov da iclasda çıxış etmişdir. Q.Hüseynov demişdir: “Bu gün biz çox əlamətdar olan iki hadisə münasibətilə toplaşmışıq. Oktyabrın 18-i Azərbaycanın Dövlət Müstəqilliyi Günüdür. Oktyabrın 9-da isə Azərbaycan Respublikası Prezidenti seçkiləri keçirilmişdir. Seçkilərdə Azərbaycanın indiki prezidenti İlham Əliyev inamlı qələbə qazanmışdır. Seçicilər sabitliyə, inkişafa, dünyanın bütün ölkələri ilə yaxşı qarşılıqlı münasibətlərə və Azərbaycanın həyatında baş verən bir sıra başqa müsbət dəyişikliklərə səs vermişlər”.
ÜAK-ın regional bölməsinin mətbuat xidmətinin rəhbəri Əlihüseyn Şükürovun AZƏRTAC-a verdiyi məlumata görə, Rusiya Federasiyası Murmansk vilayəti hökumətinin və Azərbaycan diasporunun tədbirdə iştirak edən nümayəndələri həmvətənlərimizi bayram münasibətilə səmimi təbrik etmiş, Rusiya ilə Azərbaycan arasında səmərəli əməkdaşlığın inkişafında Azərbaycan dövlətinin başçısının xidmətlərini vurğulamışlar.
Tədbirin rəsmi hissəsindən sonra konsert olmuş, Azərbaycan və rus dillərində xalq və estrada mahnıları səslənmişdir.
Bölmənin digər xəbərləri
