SİYASƏT
Murmanskda miqrantlar üçün rus dili kursları açılmışdır
Bakı, 5 oktyabr (AZƏRTAC). Rusiya Federal Miqrasiya Xidmətinin Murmansk vilayəti üzrə idarəsinin dəstəyi ilə “Murmansk pedaqoji kolleci” vilayət dövlət təhsil müəssisəsində miqrantlar üçün rus dili kursları açılmışdır.
Murmansk Pedaqoji Kollecinin direktoru Nadejda Vukolova, Federal Miqrasiya Xidmətinin Murmansk vilayəti üzrə idarəsinin rəisi, daxili xidmət polkovniki Boris Makareviç, uşaq hüquqları üzrə müvəkkil Boris Koqan, Ümumrusiya Azərbaycanlılar Konqresinin (ÜAK) Murmansk bölməsinin sədri Afil Hüseynov kursların açılışında iştirak etmişlər.
“Miqrantın məktəbi” layihəsi çərçivəsində keçiləcək rus dili məşğələlərində miqrasiya xidmətinin əməkdaşları iştirak edəcəklər. Kursların müdavimləri məşğələlərdə müxtəlif sənədlərin toplanmasına və patent almaq üçün ərizə, işləmək üçün icazə, müvəqqəti yaşayış üçün icazə, müvəqqəti pasport blanklarının doldurulmasına dair məsləhətlər ala biləcəklər.
Rus dili kurslarında təhsil xaricdə yaşayan həmvətənlərin könüllü köçürülməsi üzrə dövlət proqramında iştirak etmək üçün müraciətlərə baxılarkən müsbət amil kimi nəzərə alınacaqdır.
Azərbaycan diasporunun nümayəndələri rus dili kurslarının əhəmiyyətini yüksək qiymətləndirmişlər.
ÜAK-ın Murmansk bölməsinin sədri, Murmansk vilayəti İctimai Palatasının üzvü Afil Hüseynov qeyd etmişdir ki, rus dili kurslarının ilk müdavimləri əslən Azərbaycandan olanlardır.