SİYASƏT
Murmanskda şəhərin yeni rəmzinin – “Gözləyən qadın” abidəsinin açılışı olmuşdur
Bakı, 15 noyabr (AZƏRTAC). Balıqçıların işi çətindir, onların həyat yoldaşlarının taleyi isə heç də bundan asan deyil - bu qadınlar ildə bir neçə ay öz əzizlərinin və doğmalarının dənizdən qayıtmalarını gözləyirlər.
Rusiyanın Zapolyarye bölgəsinin paytaxtında qadınların bu sədaqətini qiymətləndirmək üçün dənizçilərin həyat yoldaşlarına abidə ucaltmaq qərara alınmışdır.
Bu günlərdə Murmanskda “Gözləyən qadın” abidəsinin açılışı olmuşdur. Murmansk balıqçıları arasında uzun illər bu peşədə çalışan azərbaycanlılar da az deyildir.
Aleksandrov küçəsindəki kiçik bağda şəhər sakinləri və veteranlar toplaşmışdır. Şəhərin rəhbərləri Murmansk sakinlərini çoxdan gözlədikləri bu abidənin açılışı münasibətilə təbrik etmişlər. Abidəni açmaq hüququ Qəhrəman şəhər Murmanskın fəxri vətəndaşı, şair Viktor Timofeyevə və Murmansk vilayətinin qubernatoru, əslən Murmanskdan olan dənizçi qızı Marina Kovtuna həvalə edilmişdir. Bu məlumatı AZƏRTAC-a Murmansk vilayəti Azərbaycan diasporu nümayəndəsi Əlihüseyn Şükürov çatdırmışdır.
Açılış mərasimində çıxış edən qubernator demişdir: “Bizim dənizçiləri və balıqçıları həmişə gözləyirlər. Balıqçı arvadları gözləməyi bacaran, etibarlı və sədaqətli qadınlardır. Çöhrəsindən nur yağan bu gözəl qadın abidəsi indən belə bizim şəhərin qadınlarının öz ərlərinə və övladlarına sədaqət, etibar və məhəbbət rəmzi olacaqdır. Bu sözlər təkcə dənizçi və ya balıqçı kişilərə yox, bütün peşələrin nümayəndələrinə aiddir. Mənim fikrimcə, bizim ən böyük keyfiyyətimiz etibarlılıq, sədaqət və sevgidir. Bu gün bizim şəhərdə ən yaxşı, ən nurlu dəyərlərin rəmzi yaranmışdır...”.
Murmanskın fəxri vətəndaşı Boris Veller də şəhər sakinlərini təbrik edərək demişdir ki, Murmanskın yaranması və mövcudluğu dənizlə bağlıdır. Lakin indiyə qədər bu şəhərdə dənizçilərin öz ailələrinə, doğmalarına, uşaqlarına bağlılığının rəmzi yox idi. Bu layihənin maliyyələşdirilməsində şəhərin 232 müəssisə və təşkilatı, 600-dən çox fiziki şəxs iştirak etmişdir. İndi bizim şəhərin belə bir rəmzi var.
Qeyd etmək lazımdır ki, “Gözləyən qadın” abidəsinin yaradılması ilə bağlı işlər cari ilin iyul ayında başlanmışdır.
Murmansk bələdiyyə qurumunun rəhbəri Aleksey Veller jurnalistlərə müsahibəsində demişdir ki, bu abidə Murmansk administrasiyası ilə şəhər sakinlərinin əməkdaşlığına çox gözəl nümunədir. A.Veller demişdir: “Xatırlatmaq istəyirəm ki, abidə üçün vəsait məhz şəhər sakinləri və vilayət mərkəzinin müəssisələri tərəfindən yığılmışdır. Bağın abadlaşdırılması üçün vəsait büdcədən ayrılmışdır. Ümid edirəm ki, biz Murmansk sakinləri arasında çox populyar olacaq bir məkan yarada bilmişik. Bu, layiqli bağ və layiqli abidədir...”.