Naxçıvan, 28 iyul, AZƏRTAC

Bu il yanvarın 1-i tarixinə olan məlumata əsasən, muxtar respublikada 97 min 793 ailə vardır ki, bu da keçən illə müqayisədə 752 ailə və ya 0,77 faiz çoxdur. Bunlardan 1373-ü qaçqın və məcburi köçkün, 220-si şəhid ailəsidir.

Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsindən AZƏRTAC-ın Naxçıvan bürosuna bildirilib ki, bu faktlar komitədə keçirilən kollegiya iclasında səsləndirilib.

İclasda komitə sədri Ramilə Seyidova çıxış edərək bildirib ki, hesabat dövrü ərzində 412 aztəminatlı ailə vardır, bu da keçən illə müqayisədə 49 ailə və ya 10,63 faiz azdır. Diqqətə çatdırılıb ki, muxtar respublikada 230 min 32 qadın yaşayır, bu da keçən illə müqayisədə 1678 nəfər çoxdur.

Qeyd olunub ki, məşğulluğun təmin edilməsi məqsədilə aztəminatlı ailədən olan 51 qadın peşə kurslarına cəlb olunub, bu da ötən illə müqayisədə 26 qadın çoxdur. Bundan əlavə, 24 əməkqabiliyyətli vətəndaşın, o cümlədən 23 qadının isə işlə təmin olunması üçün məlumatları aid orqanlara göndərilib.

Komitə sədri deyib: Bəhs olunan dövrdə Avropa İttifaqının maliyyələşdirdiyi və BMT İnkişaf proqramının icra etdiyi layihə çərçivəsində həyata keçirilən “Qadınların Dayanıqlı İnkişaf üçün Səlahiyyətləndirilməsi” layihəsinin yekun konfransı keçirilib. Həmçinin konfransda layihə iştirakçısı olan qadınların hazırladıqları 1600-dən çox əl işindən və istehsal məhsulundan ibarət sahibkarlıq sərgi-satışı təşkil edilib.

Hesabat dövrü ərzində müvafiq layihənin davamı olaraq “Koronavirusdan qorunma tədbirləri” mövzusunda 3 seminar keçirilib. Həmin seminarlarda, ümumilikdə, 39 qadın iştirak edib, onlara Azərbaycan Mikromaliyyə Assosiasiyası və layihə təşkilatçıları tərəfindən sərmayə kapitalının (ümumilikdə, 25 min 550 manat dəyərində vəsait) verilməsi ilə əlaqədar bağlanılan müqavilələr təqdim olunub.

Bildirilib ki, hesabat dövründə 8 mart - Beynəlxalq Qadınlar Günü ilə bağlı silsilə tədbirlər “Müstəqillik illərində Naxçıvan qadınlarının keçdiyi tarixi yol” mövzusunda bayram tədbiri ilə yekunlaşıb. Komitə tərəfindən müxtəlif nominasiyalar üzrə səmərəli fəaliyyətlərinə görə fərqlənən 50 qadına diplom, eləcə də tədbirdə iştirak edən qadınlara hədiyyələr verilib. Həmçinin tədbirdə 1210 rəsm və əl işi, 87 kitab və 580 adda ailə təsərrüfatı məhsulundan ibarət sərgi-satış təşkil olunub.

Çıxışda ailələrin hüquqlarının qorunması, sosial problemlərinin öyrənilməsi və həll edilməsinin diqqətdə saxlanılmasından, 15 may - Beynəlxalq Ailə Günü və 1 iyun - Uşaqların Beynəlxalq Müdafiəsi Günü münasibətilə komitə tərəfindən silsilə tədbirlər keçirilməsindən də bəhs olunub. Qeyd edilib ki, muxtar respublika əhalisinin 164 min 546 nəfərini, yəni 35,80 faizini uşaqlar təşkil edir, bu da ötən illə müqayisədə 1265 uşaq və ya 0,77 faiz çoxdur. Bəhs olunan dövrdə muxtar respublika üzrə 1814 sağlamlıq imkanları məhdud uşağın rayon, şəhər, illər və xəstəliklər üzrə təhlili aparılıb, bu kateqoriyadan olan 10 uşaq məktəbdənkənar təlim-tərbiyə və müalicə-reabilitasiya müəssisələrinə göndərilib.

Bildirilib ki, cari ilin 6 ayı ərzində elektron məlumat bankına 5689 uşaq haqqında fərdi məlumatlar daxil edilib, ümumilikdə, elektron məlumat bankında 30086 uşaq haqqında məlumat işlənilib.

Muxtar respublikada yaşayan 583 uzunömürlü ailə haqqında məlumatlar yaradılan məlumat bazasına əlavə edilib.

Sonra məruzə ətrafında çıxışlar olub.