Naxələf qonşu ölkə tərəfindən növbəti təxribat
Bakı, 14 mart, Ziyadxan Həsənov, AZƏRTAC
İran İslam Respublikasının hakimiyyət orqanları Azərbaycanın Tehrandakı səfirliyində törədilmiş, ölkəmizin təhlükəsizlik xidməti zabitinin öldürülməsi və diplomatik nümayəndəliyimizin bir əməkdaşının yaralanması ilə nəticələnmiş terror aktı barədə sorğuya hələ cavab verməmiş, ölkəmizə qarşı növbəti təxribat törədilib. İran İslam Respublikasının hərbi hava qüvvələri Amerika istehsalı olan köhnə təyyarələri havaya qaldıraraq Azərbaycanla sərhəddə təxribat xarakterli uçuşlar keçirib.
2023-cü il martın 11-də İrana məxsus hərbi təyyarə yerli vaxtla saat 09:44-dən 10:26-dək Azərbaycan-İran dövlət sərhədi boyunca Zəngilan rayonundan Biləsuvar rayonuna qədər və əks istiqamətdə fasiləsiz uçuş keçirib. Təyyarə iki ölkə arasında dövlət sərhədindən 3-5 kilometr məsafədə, bəzi sahələrdə isə dövlət sərhədinin səması üzərində uçub.
Azərbaycan hökuməti ölkəmizin İrandakı səfirliyinə hücumla əlaqədar yanvarın 27-dən Tehrandan cavab gözləyir, İran isə müxtəlif bəhanələr gətirir, guya təqsirsiz olduğunu göstərməyə çalışır. Bu gün nəinki Azərbaycanda, hətta sivil dünyanın digər paytaxtlarında da əsla şübhə doğurmur ki, Azərbaycanın Tehrandakı diplomatik nümayəndəliyinin binası qarşısında və bina daxilində atəş açılması qonşu dövlətin hakimiyyət strukturlarının razılığı ilə hazırlanıb və həyata keçirilib. Silahlı terrorçunun səfirliyin binası qarşısında sərbəst gəzişməsi çoxsaylı videokadrlarda aşkar görünür.
İran bu aksiyalarla nə göstərmək istəyir? Dünya praktikasında bunun bir adı var - “mesaj”. Bir dövlət başqa ölkənin siyasətindən narazı olmasını bu şəkildə ifadə edir, ona qarşı müəyyən hərəkətlər törədir.
İran ölkəmizə iddialarını gizlətmir. Molla rejimi belə hesab edir ki, biz qara paltar geyinib mitinqlərə çıxmalı və “Amerikaya ölüm”, “İsrailə ölüm” kimi şüarlar səsləndirməli, müxtəlif ölkələrin nümayəndələrini Azərbaycana buraxmamalıyıq. Onların fikrincə, Azərbaycan sakinləri qonşu ölkənin din xadimlərini tərifləməli, onların “ağıllı kəlamları”ndan sitatlar gətirməlidirlər. Bir sözlə, molla rejimi istəyir ki, Azərbaycan İran İslam Respublikasının siyasi əyalətinə çevrilsin, Arazın bu tayındakı ölkənin hakimiyyət orqanları özünün bütün addımlarını İranla razılaşdırsınlar.
İranın Ermənistanı dəstəkləməsi haqqında çox deyilib, çox yazılıb. Son 30 ildə bu iki ölkədə hakimiyyətə kimin gəlməsindən asılı olmayaraq, onların Azərbaycana düşmən münasibəti dəyişməyib. Belə çıxır ki, əgər yaxın vaxtlarda İranın özündə əsaslı dəyişiklər baş verməsə, İranın Azərbaycana münasibətdə yeritdiyi siyasətində ciddi dəyişikliklər olmayacaq.
Azərbaycan öz dövlət müstəqilliyini bərpa edəndən sonra regiondakı bütün dövlətlərlə mehriban qonşuluq münasibətləri prinsipinə daim riayət edib. Ölkəmizin rəhbərliyi bu kursu əsas götürərək bir sıra ölkələrlə praqmatik siyasət qurub və bu siyasət öz nəticələrini verir. Dünyanın bütün ölkələri Azərbaycanın ərazi bütövlüyünü dəstəkləyir və ölkəmizlə uzunmüddətli siyasi, iqtisadi və mədəni münasibətlər qurur.
Bu günlərdə Bakıda Azərbaycan Prezidenti İlham Əliyevin himayəsi ilə “Dünya bu gün: Çağırışlar və ümidlər” mövzusunda X Qlobal Bakı Forumu keçirildi. Beynəlxalq Nizami Gəncəvi Mərkəzi tərəfindən təşkil edilmiş bu forumda dünyanın 61 ölkəsindən 360 nümayəndə, o cümlədən 4 prezident, 2 baş nazir, 6 spiker və nazir, BMT-nin 5 qurumunun rəhbərləri, 25 sabiq prezident, 21 sabiq baş nazir, 23 ölkənin xarici işlər nazirlərinin müavinləri üç gün ərzində müxtəlif ölkələrin və müxtəlif dinlərin dinc yanaşı yaşaması məsələlərini müzakirə etdilər. Bakı dünyanı dostluğa, dözümlülüyə, mehriban qonşuluğa səslədi. Bəs ölkəmizin paytaxtından səslənən bu çağırışlara İran İslam Respublikası necə cavab verdi?! İİR tərəfindən hədələr, onun kəşfiyyat təyyarəsinin bizim sərhədlərin yaxınlığında uçması. Əlbəttə, Tehranda yaxşı bilirlər ki, Azərbaycanın müasir ordusu var, bu ordu öz gücünü döyüş meydanında göstərib. Lakin İranda onu da başa düşməlidirlər ki, dünyada qüdrətli ölkələr var, onlar Bakını çətin vəziyyətdə qoymayacaq, Azərbaycana qarşı hər hansı təcavüzə cavab verəcəklər.
Bölmənin digər xəbərləri
