Nazir Emin Əmrullayev İstanbulda Türk Şurasının toplantısında çıxış edib VİDEO
İstanbul, 4 noyabr, AZƏRTAC
Azərbaycan Respublikasının təhsil naziri Emin Əmrullayevin rəhbərlik etdiyi nümayəndə heyətinin Türkiyə Respublikasına səfəri davam edir.
AZƏRTAC xəbər verir ki, səfər çərçivəsində nazir Emin Əmrullayev İstanbulda keçirilən Türkdilli Dövlətlərin Əməkdaşlıq Şurasına üzv ölkələrin təhsil nazirlərinin VI toplantısında iştirak edir.
Tədbirdə Türkiyə Prezidenti Rəcəb Tayyib Ərdoğanın toplantı iştirakçılarına müraciəti səsləndirilib.
Müraciətində bu il türk dünyası olaraq Türk Şurasının yaradılmasının 12-ci ildönümünü qeyd etdiyimizi xatırladan Prezident Ərdoğan ötən dövr ərzində şuranın ölkələr arasında qardaşlığın, həmrəyliyin və əməkdaşlığın rəmzi halına gəldiyini və şura çərçivəsində keçirilən müxtəlif səviyyəli tədbirlərdəki ünsiyyətin hər sahədə təcrübə mübadiləsi, eləcə də yeni ortaqlıqların qurulmasına vəsilə olduğunu vurğulayıb.
Türk Şurasının da öz quruluşunu tamamlayaraq, yeni qatılan ölkələrlə gücünü, etibarını və dünyada təsirini daha da artırdığını vurğulayan Türkiyə Prezidenti bu il noyabrın 12-də Türkiyənin ev sahibliyi ilə İstanbulda keçiriləcək VIII Zirvə Görüşünün şuranın tarixində bir dönüş nöqtəsi olacağına ümidvar olduğunu ifadə edib. Hazırda keçirilən bu tədbirin gələcəyimizin təminatı olan gənclərimizə daha keyfiyyətli təhsil verə bilmək üçün bir yolgöstərici olacağına inandığını vurğulayıb.
Tədbirdə çıxış edən nazir Emin Əmrullayev Ermənistanın 30 ilə yaxın Azərbaycana qarşı apardığı işğalçı siyasətindən və ölkəmizin Vətən müharibəsi nəticəsində torpaqlarını işğaldan azad etməsindən danışıb. Nazir 44 günlük Vətən müharibəsi dövründə başda Türkiyə olmaqla, Azərbaycana siyasi və mənəvi dəstək verən bütün ölkələrə minnətdarlığını ifadə edib.
Nazir toplantıda iki qardaş ölkənin təhsil müəssisələrində tədrisinə başlanılması nəzərdə tutulan ortaq türk tarixi və coğrafiyasına dair dərsliklərin ən qısa zamanda tədris proqramlarına daxil ediləcəyinə ümidvar olduğunu bildirib.
Tədbir çərçivəsində keçiriləcək Türkdilli Dövlətlərin Əməkdaşlıq Şurasının IV Elmi Şurasında sədrlik Azərbaycan Respublikasından Türkiyə Respublikasına ötürüləcək.
Xatırladaq ki, səfər çərçivəsində Azərbaycanın təhsil naziri Emin Əmrullayev Türkiyənin milli təhsil naziri Mahmut Özər və Ali Təhsil Şurasının rəhbəri Erol Özvarla görüşüb.
Görüşlərdə “Azərbaycan Respublikası Hökuməti ilə Türkiyə Respublikası Hökuməti arasında peşə təhsili sahəsində əməkdaşlığa dair Protokol”un icrasından irəli gələn məsələlər və “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” ətrafında fikir mübadiləsi aparılıb.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
