Nazirlik tərəfindən karxana istismarçılarına müasir texnologiyalarla işləmək tövsiyə olunub
Bakı, 26 oktyabr, AZƏRTAC
Oktyabrın 26-da Ekologiya və Təbii Sərvətlər Nazirliyində növbəti mətbuat konfransı keçirilib.
AZƏRTAC xəbər verir ki, tədbirdə oktyabrın 25-də havada müşahidə olunan tozun səbəbləri və atmosfer havası haqqında məlumat verilib. Bundan əlavə, konfransda şadlıq saraylarının və karxanaların fəaliyyəti zamanı atmosferə atılan tullantılar mövzusuna da toxunulub. Şadlıq saraylarının fəaliyyətinin dayandırılması istiqamətində görüləcək tədbirlər haqqında KİV nümayəndələrinə məlumat verilib.
Brifinqdə iştirak edən nazirliyin ekoloji maarifləndirmə və ictimaiyyətlə əlaqələr şöbəsinin müdiri Umayra Tağıyeva Avropa Parlamenti tərəfindən plastik qablaşdırma məhsullarının qadağan olunması ilə bağlı qərar qəbul olunduğunu diqqətə çatdırıb. O, bildirib ki, qərara görə plastik məhsulların istifadəsi 2021-ci ilədək qadağan olunmalıdır.
“Ölkəmizdə də bu istiqamətdə artıq müəyyən işlər görülməkdədir. Belə ki, nazirlik tərəfindən kompleks tədbirlər planı hazırlanır. Bu məqsədlə prosesin ilkin mərhələsində ictimai rəyin öyrənilməsi üçün əhali arasında sorğu keçirilməsi planlaşdırılır. Əlbəttə ki, bu tədbirlər bütün tərəflərin maraqlarını nəzərə alınaraq mərhələli şəkildə həyata keçiriləcək. Toplanma və çeşidlənmə işlərinə əhalini cəlb etmək üçün bugünədək nazirliyin təşəbbüsü ilə başlanılan kampaniya çərçivəsində, ümumilikdə, 35 şəhər və rayon üzrə plastik qabların toplanması və çeşidlənməsi üçün 100-dək konteyner yerləşdirilib. Onlardan 32-si nazirlik, 50-si rayon icra hakimiyyətləri, 12-si yerli sahibkarlar, 2-si isə "AzEkol" Məhdud Məsuliyyətli Cəmiyyəti tərəfindən hazırlanıb”.
U.Tağıyeva deyib: “Lakin ölkədə ekoloji problemlər tək plastik tullantılarla bağlı deyil, eyni zamanda, həm məişətdə, həm tikintidə, həm də karxanaların fəaliyyəti zamanı əmələ gələn və düzgün idarə olunmayan tullantılarla bağlıdır. Abşeron yarımadasının landşaftı, bildiyiniz kimi, toz miqdarının çox olması üçün səciyyəvi ərazilərdən biridir. Təbii şəraitlə yanaşı, antropogen təsir bu vəziyyəti daha da gərginləşdirir. Növbəti dəfə dünən Abşeron yarımadasında cənub-qərb küləyinin güclənməsi nəticəsində atmosfer havasında tozun miqdarı normanı 3 dəfə keçib.
Nazirlik tərəfindən bu sahədə aparılan operativ monitorinq işləri sübut edir ki, belə vəziyyətin yaranmasına səbəb Qaradağ rayonu ərazisində yerləşən karxanalardır. Həm tikintidə, həm də daş karxanalarının fəaliyyəti zamanı ekoloji və tikinti qaydalarına riayət olunmaması yolverilməzdir.
Təəssüflə qeyd edirik ki, nazirlik tərəfindən daş karxanalarının sahiblərinə işlərində dönüş yaratmaları üçün müəyyən müddət verilməsinə baxmayaraq, onlar vəziyyəti yaxşılaşdırmaq üçün bir addım belə atmayıblar. Bu sahədə qabaqcıl ölkələrdə istifadə olunan texnologiyalar bizdə də tətbiq edilməlidir. Ətraf mühitə antropogen təsiri azaltmaq öz əlimizdədir, çünki bu diyarda sahibkarla bərabər hamımız yaşayırıq və atmosferdə olan toz onunla birgə hamıya təsir edir. Nazirliyin təmiz bir mühitdə yaşamaq naminə həyata keçirdiyi tədbirlərə dəstək verən hər bir vətəndaşa təşəkkür edir və ictimaiyyəti ekoloji vəziyyətin yaxşılaşdırılmasında fəal olmağa çağırırıq”.
Tədbirdə nazirliyin Ətraf Mühit üzrə Milli Monitorinq Departamentinin direktoru Ramal Bağırov bildirib ki, paytaxtda havanı bürüyən toz-duman lokal xarakterlidir və onun əsas mənbələrindən biri şəhəri əhatə edən daş karxanalarıdır. Bununla bağlı nazirliyə əhali tərəfindən çoxlu sayda şikayətlər daxil olur.
Daş karxanalarındakı mövcud vəziyyətlə əlaqədar nazirlik tərəfindən araşdırmalar aparılıb, istismar sahələrində və ətraf ərazilərdə monitorinqlər keçirilib. Araşdırmaların nəticəsində müəyyən edilib ki, əksər daş karxanalarının fəaliyyəti hüquqi və normativ tələblərə cavab vermir, istismar sahələrində ekoloji norma və qaydalara riayət edilmir. Ətraf mühitə, təbiətə ziyan vurulur, böyük həcmdə toz kütləsinin ətrafa yayılmasına şərait yaradılır. Bu da ətraf ərazilərdə yaşayan sakinlərin, bütövlükdə paytaxt əhalisinin sağlamlığına, ekoloji mühitə olduqca mənfi təsir göstərir. Bütün bunlara səbəb daş karxanalarında elementar normalara əməl edilməməsi, istifadə olunan avadanlıqların müasir tələblərə cavab verməməsidir. Karxanaların demək olar ki, hamısında 1960-70-ci illərdən qalmış avadanlıq və texnologiyadan istifadə olunur.
Nazirlik tərəfindən bütün bu pozuntular karxana istismarçılarının diqqətinə çatdırılıb, görüşlərdə karxanalardakı təbiətə və insanlara zərər verən mövcud vəziyyət izah olunub. Karxana istismarçılarına yeni və müasir tələblərə cavab verən texnologiyalarla işləmələri tövsiyə edilib. Lakin xeyli müddət ötməsinə baxmayaraq, istismarçılardan heç biri bu istiqamətdə addım atmayıb. Qoyulan tələblərə cavab verməyən, müasir texnologiyalardan istifadə etməyən karxanalar barəsində yaxın vaxtlarda qanunauyğun tədbirlər görüləcək, fəaliyyətlərinin dayandırılması üçün müvafiq orqanlar qarşısında vəsatət qaldırılacaq.
Bölmənin digər xəbərləri
