NƏQLİYYAT NAZİRİ FÖVQƏLADƏ HALLARIN NƏTİCƏLƏRİNİN ARADAN QALDIRILMASI İLƏ BAĞLI ƏMR İMZALAMIŞDIR
Bakı, 13 may (AZƏRTAC). Nəqliyyat Nazirliyindən bildirmişlər ki, Kür çayının məcrasından çıxması ilə əlaqədar Şirvan şəhərinin ətraf ərazilərinin, Sabirabad, Salyan və Zərdab rayonlarının daşqınlara məruz qalması, eyni zamanda intensiv leysan yağışları və torpaq sürüşmələri nəticəsində Balakən, Qəbələ, Ağsu, Şamaxı, İsmayıllı, Quba, Qusar, Gədəbəy, Göygöl və digər rayonlarda nəqliyyat-yol kompleksi sahələrinə, o cümlədən avtomobil və dəmir yollarına ciddi ziyan dəymişdir. Yaranmış çətinliklərlə bağlı həmin ərazilər üzrə nəqliyyatın hərəkətində məhdudiyyətlər tətbiq olunmuş, bəzi marşrutlarda dəyişikliklər edilmişdir.
Həmin məsələlərin həllinə yönəlmiş işlərin təşkili, istiqamətləndirilməsi, əlaqələndirilməsi, fövqəladə halların qarşısının alınması və nəticələrinin aradan qaldırılması sahəsində ölkənin digər müvafiq dövlət qurumları ilə yanaşı, Nəqliyyat Nazirliyi tərəfindən də zəruri tədbirlər görülməkdədir.
Nəqliyyat naziri Ziya Məmmədov bu sahədə işlərin daha operativ görulməsi və təxirəsalınmaz tədbirlərin həyata keçirilməsinin təmin olunması məqsədi ilə əmr imzalamışdır. Əmrdə “Azərbaycan Dəmir Yolları” QSC-yə və “Azəryolservis” ASC-yə tapşırılmışdır ki, göstərilən ərazilərdə tam həcmli bərpa işlərinin aparılması üçün şəraitin yaranacağı müddətədək baş vermiş fövqəladə halların nəticələrinin aradan qaldırılması, eləcə də qəza-bərpa işlərinin görülməsi üçün bütün zəruri texnika və işçi qüvvəsinin səfərbər olunmasını və səlahiyyətləri daxilində bu istiqamətdə müvafiq təxirəsalınmaz tədbirlərin həyata keçirilməsini təmin etsinlər.
Bundan əlavə, əmrə əsasən, baş vermiş fövqəladə hallar nəticəsində dəymiş zərərin həcmi müəyyənləşdirilməli, nəqliyyat infrastrukturu obyektlərinin təbii fəlakətlərin təsirindən qorunması və təhlükəsiz istismarı üçün müvafiq qabaqlayıcı tədbirlər həyata keçirilməli, müvafiq ərazilər üzrə aparılacaq bərpa işlərinin gedişi və nəticələri barədə mütəmadi olaraq nəqliyyat nazirinə məlumat verilməlidir.
“Avtonəqliyyatservis” departamentinə tapşırılmışdır ki, fövqəladə hallar nəticəsində yaranmış mövcud vəziyyətlə əlaqədar aidiyyəti üzrə zəruri işlərin görülməsini təmin etsin. Əmrə müvafiq olaraq, nazirliyin təhlükəsizlik və fövqəladə hallar şöbəsi baş vermiş fövqəladə halların qarşısının alınması və nəticələrinin aradan qaldırılması sahəsində görülən işlərin əlaqələndirilməsini təmin etməlidir.
Bölmənin digər xəbərləri
