CƏMİYYƏT
Nəsimi rayonunda daha bir abad həyət sakinlərin istifadəsinə verilib VİDEO
Bakı, 22 fevral, AZƏRTAC
Nəsimi rayonunda küçə və parkların, məhəllə və binaların abadlaşdırılması, həyətlərin yenidən qurulması, yeni infrastrukturların yaradılması, yaşıllıqların salınması işləri uğurla davam etdirilir.
Bakı Şəhər İcra Hakimiyyətinin mətbuat xidmətindən AZƏRTAC-a bildiriblər ki, həyata keçirilən silsilə tədbirlər çərçivəsində həyətyanı sahəsi 1 hektar olan, 650 nəfər sakinin yaşadığı Hüseyn Seyidzadə küçəsi 17 və 21 saylı binaların əhatə etdiyi ərazidə abadlıq, quruculuq və yenidənqurma işləri başa çatdırılaraq həyət ilk çərşənbə günündə - Su çərşənbəsində sakinlərin istifadəsinə verilib.
Həyət milli-mənəvi dəyərlərimizi özündə əks etdirən ornamentlərlə bəzədilib və tonqal qalanıb. Məhəllədəki uşaqlar tonqal ətrafında şənləniblər. Bayram süfrəsi arxasında səmimi söhbət edən məhəllə sakinləri bir-birilərini Su çərşənbəsi günü və həyətlərində aparılan abadlıq işlərinin başa çatması münasibətilə təbrik edib, onlara göstərilən diqqət və qayğıya görə ölkə rəhbərliyinə minnətdarlıqlarını bildiriblər.
Hazırlanmış layihəyə uyğun olaraq Hüseyn Seyidzadə küçəsi 17 və 21 saylı binaların dam örtükləri əsaslı təmir edilib, yağış suları axıdan yeni borular və navalçalar quraşdırılıb. Hüseyn Seyidzadə küçəsi 17 saylı binanın fasadı əsaslı təmir edilib, 4 giriş qapısı, pilləkən qəfəslərinin 16 ədəd pəncərəsi dəyişdirilib.
Görülmüş işlər çərçivəsində binaların əhatə etdiyi həyətə 1400 kvadratmetr asfalt örtüyü, 1000 kvadratmetrdən çox qazon, 500 kvadratmetrə yaxın tamet daşı vurulub, 350 poqonometr yeni bordür və kiçik tullantıların atılması üçün 2 ədəd yeni zibil qutusu qoyulub, 100 poqonometr istinad divarı bərpa olunub.
Sakinlərin asudə vaxtlarının səmərəli təşkili üçün binaların həyətinə söhbətgahlar və oturacaqlar qoyulub, müxtəlif növ uşaq oyun elementləri və idman qurğuları quraşdırılıb.
Abadlıq işləri aparılan ərazidəki mövcud yaşıllıqların bərpası ilə yanaşı, məhəlləyə 100 ədəd müxtəlif növ həmişəyaşıl ağac, 200 ədəd dekorativ çiçəklər əkilib, mövcud yaşıllıqlara və ağaclara aqrotexniki qaydada qulluq olunub.
Həyətdə işıqlandırma sistemləri yenidən qurulub.
Rayon ərazisində aparılan abadlıq-quruculuq və yenidənqurma işləri əhalinin böyük razılığı ilə qarşılanır, görülən işlərə görə rayon sakinləri dövlətimizin başçısına dərin minnətdarlıqlarını bildirirlər.
Hazırda rayonun daha bir neçə ünvanında abadlıq-quruculuq və yenidənqurma işləri aparılır.