NİJNİ NOVQOROD VİLAYƏTİNİN QUBERNATORU GENNADİ XODIREVİN ÇIXIŞI
Hörmətli dostlar!
Yoldaşlar, xanımlar və cənablar!
İcazə verin, şəxsən öz adımdan, Nijni Novqoroq vilayətinin hökuməti adından sizi salamlayım və birgə işimizin bayramı, məşhur “Krasnoye Sormovo” zavodunda inşa olunmuş “Prezident Heydər Əliyev” tankerinin istifadəyə verilməsi münasibətilə təbrik edim. Tankerə Heydər Əlirza oğlu Əliyevin adı təsadüfən verilməmişdir. Məhz onun rəhbərliyi ilə Azərbaycan keçmiş Sovet İttifaqında ən yüksək inkişaf səviyyəsinə çatmışdı. Bir çox digər keçmiş ittifaq respublikalarından fərqli olaraq, Azərbaycan məhz Heydər Əliyevin müdrikliyi və uzaqgörənliyi sayəsində 1990-cı illərin əvvəllərində cürbəcür sosial sarsıntılardan, kataklizmlərdən uzaq ola bilmişdir. Onun şəxsiyyətinin və fəaliyyətinin miqyasına həqiqi qiyməti ancaq insanlar və yalnız onların öz qəlblərində yaşatdıqları xatirələr verir. Yaxın keçmişdəki ümumi ölkəmizin - Sovet İttifaqının da, bugünkü müstəqil dövlətlərimizin də bəxti çox gətirmişdir ki, Heydər Əliyev kimi insan bizimlə olmuşdur və olaraq qalır. O, öz Vətəninə, öz xalqına xidmət, dəyanət və əzmkarlıq nümunəsidir. Milli liderin adını daşıyan gəmi bu böyük insanın ölkələrimizə və xalqlarımıza münasibətinə görə ona öz minnətdarlığımızı və dərin hörmətimizi ifadə etmək imkanı ilə yanaşı, həm də dostluğumuzun və işbirliyimizin əyani təcəssümüdür.
Heydər Əlirza oğlunun Rusiya Prezidenti Vladimir Vladimiroviç Putinlə görüşü ölkələrimiz arasında siyasi ab-havanı kökündən dəyişdirdi, onu iqtisadi və mədəni əməkdaşlıq üçün əlverişli etdi. Sov.İKP MK-da işlədiyim dövrdə mənə Heydər Əlirza oğlu ilə dəfələrlə görüşmək xoşbəxtliyi nəsib olmuşdu. O, biz cavanlara deyirdi: “Yalnız o ölkə və yalnız o xalq tərəqqi edəcək və əbədi yaşayacaqdır ki, onlar öz tarixi ənənələrini qoruyub saxlayacaq, zənginləşdirəcək və nəsildən-nəslə ötürəcəkdir”. Heydər Əliyevin, zənnimcə, Azərbaycanın rəhbəri vəzifəsində uzun illər ərzində uğurlu fəaliyyətinin rəhni, öz əcdadlarının, öz xalqının ənənələrinə müqəddəscəsinə əməl etməsi olmuşdur. Dünyanın çox rəhbərlərindən fərqli olaraq, o, özünə varisi vaxtında və düzgün hazırlaya bildi ki, öz işini arxayınlıqla ona təhvil versin. Belə bir varisin onun oğlunun, Azərbaycanın indiki Prezidenti İlham Heydər oğlu Əliyevin olması Heydər Əliyevin öz xalqının, öz ölkəsinin taleyi üçün, onun gələcəyi üçün çox yüksək məsuliyyət daşıdığını bir daha göstərir.
/ardı var/QGBE
Biz bu yaxınlarda Ümumrusiya Azərbaycan Konqresinin Moskvada keçirilən ikinci qurultayının işini diqqətlə izlədik. Azərbaycan Prezidentinin və Rusiya Prezidentinin qurultayda iştirakı belə bir əminlik yaradır ki, liderlərimizin götürdüyü siyasi xətt daimi olacaq, genişlənəcək və dərinləşəcəkdir. Ölkələrimizin prezidentləri regionlararası əlaqələrin möhkəmlənməsini hər cür dəstəkləyir, Rusiya və Azərbaycan əmtəə istehsalçılarının işinin səmərəli olması üçün yeni imkanlar yaradırlar. Elə bu günlərdə Prezident İlham Heydər oğlunun razılığı ilə Azərbaycan hökuməti və Nijni Novqorod vilayəti hökuməti arasında ticarət-iqtisadi və elmi-texniki əməkdaşlıq haqqında saziş hazırlanır. Əminəm ki, belə bir sənədin imzalanması insanlarımız arasında dostluğun möhkəmləndirilməsinə və qarşılıqlı surətdə faydalı iqtisadi layihələrin həyata keçirilməsinə yeni təkan verəcəkdir.
Hörmətli İlham Heydər oğlu!
Nümayəndə heyətimizə göstərdiyiniz diqqətə, şəxsən məni qəbul etməyə imkan tapdığınıza görə Sizə minnətdarlığımı bildirirəm. Biz Xəzər Dəniz Gəmiçiliyi İdarəsinin rəhbərliyinə, şəxsən cənab Bəşirova respublika hökumətinin və Bakı şəhəri müəssisələrinin digər rəhbərlərinə səmimi qəbula, Bakıda olduğumuz müddətdə bizə göstərilən mehribanlığa, qonaqpərvərliyə görə təşəkkür edirik. Əminəm ki, indiki təntənəli mərasim ölkələrimizin iqtisadi qüdrətinin möhkəmlənməsi sahəsində birgə işimizə nümunə və deməli, dahi insan Heydər Əlirza oğluna ən yaxşı abidələrdən biri olacaqdır.
Hörmətli cənab Prezident, hörmətli dostlar, bu böyük təşəbbüsə görə sizi təbrik edirik!
X X X
Gennadi Xodırev Nijni Novqorod vilayəti hökuməti adından Xəzər Dəniz Gəmiçiliyinin rəisi Aydın Bəşirova təbriknamə və xatirə hədiyyəsi, yeni gəminin kapitanına isə tankerdə açılacaq Heydər Əliyev muzeyi üçün hədiyyə təqdim etdi.
Azərbaycan Prezidenti İlham Əliyev mərasimdə nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
Bölmənin digər xəbərləri
