Nizami Gəncəvi Beynəlxalq Mərkəzinin yeni üzvləri Azərbaycana səfərə gələcəklər
Bakı, 19 aprel (AZƏRTAC). Avropada təhlükəsizlik və əməkdaşlıq haqqında Helsinki aktının imzalanmasının 40 illiyi ərəfəsində - 2015-ci ilin aprelində keçirilməsi nəzərdə tutulan III Qlobal Müştərək Cəmiyyətlər Forumuna hazırlıq məqsədilə Nizami Gəncəvi Beynəlxalq Mərkəzinin icraçı direktoru Rövşən Muradov bir sıra ölkələrdə görüşlər keçirir. Diasporla İş üzrə Dövlət Komitəsindən AZƏRTAC-a bildiriblər ki, mərkəzin təmsilçisi İsveçrədə Belçikanın sabiq Baş naziri, hazırda isə “İnternational İDEA”ya rəhbərlik edən İv Letermlə görüşərək Foruma hazırlıqla bağlı fikir mübadiləsi aparıb. Nizami Gəncəvi Beynəlxalq Mərkəzinin üzvü olan İv Leterm bu ilin aprelində keçirilmiş II Qlobal Müştərək Cəmiyyətlər Forumunda iştirak edib.
Həmçinin Slovakiyanın paytaxtı Bratislavada bu ölkənin sabiq Prezidenti, Baş naziri və Xarici İşlər naziri Mikulaş Dzurinda, Budapeştdə Macarıstanın keçmiş hökumət başçısı Peter Medeşi ilə görüş keçirilib. Hər iki siyasətçi mərkəzin üzvlüyünə qəbul olunub. Onlar təşkilatın yeni nümayəndələri kimi oktyabrda və noyabrda Azərbaycana gələrək Nizami Gəncəvi Beynəlxalq Mərkəzinin işi ilə yaxından tanış olacaqlar.
İki ildir fəaliyyət göstərən Nizami Gəncəvi Beynəlxalq Mərkəzi Azərbaycanda yaradılsa da idarə heyətinin tərkibi və üzvləri dünyanın tanınmış siyasi xadimlərindən ibarətdir. Qurum Madrid Klubu ilə birgə 2013-cü və 2014-cü illərdə iki böyük beynəlxalq forum keçirib. Hər iki tədbir Diasporla İş üzrə Dövlət Komitəsinin dəstəyi ilə baş tutub.
Bölmənin digər xəbərləri
