Nizami Tibb Mərkəzi HIMSS-nin beynəlxalq akkreditasiya sertifikatını əldə edib
Bakı, 14 iyul, AZƏRTAC
Tibbi Ərazi Bölmələrini İdarəetmə Birliyinin (TƏBİB) tabeliyindəki Nizami Tibb Mərkəzi Amerika Birləşmiş Ştatlarının (ABŞ) Səhiyyə İnformasiya və İdarəetmə Sistemləri Cəmiyyətinin (HIMSS) xəstəxana məlumatlarının idarəedilməsi sistemi üzrə beynəlxalq dərəcəli nüfuzlu akkreditasiya sertifikatını əldə edib.
TƏBİB-dən AZƏRTAC-a verilən məlumata görə, sertifikat HIMSS-nin önəmli qiymətləndirmə modulu hesab olunan Elektron Tibbi Qeydiyyatın Adaptasiyası Modulu (EMRAM) VI səviyyə üzrə təqdim edilib. Sertifikat informasiya texnologiyaları və idarəetmə sistemlərindən ən yaxşı şəkildə istifadə etməklə səhiyyə xidmətinin keyfiyyətli, təhlükəsiz, səmərəli formada daim təkmilləşdirilməsinə görə təqdim olunur.
Azərbaycanda rəqəmsal səhiyyə ekosisteminin inkişafı, eləcə də, göstərilən tibbi xidmətlərin keyfiyyətinin artırılması istiqamətində HIMSS təşkilatı ilə əməkdaşlıq çərçivəsində 2024-cü ilin sentyabr ayından başlayaraq Nizami Tibb Mərkəzində akkreditasiya sertifikatının əldə edilməsinə dair hazırlıq işlərinə başlanılıb.
TƏBİB-in tabeliyindəki “Rəqəmsal Tibbi Həllər” MMC və Nizami Tibb Mərkəzinin İşçi qrupu tərəfindən icra edilən işlər çərçivəsində müalicə prosesi ilə bağlı təyinatlar, müəssisədaxili tibbi sənədləşmələr elektronlaşdırılıb, həkimlər, eləcə də, tibb bacıları üçün elektron Qərar Dəstəyi Sistemləri (QDS) hazırlanıb və tətbiq olunub. Həmçinin Xəstəxana İdarəetmə Sisteminin (XİS) dayanıqlığı üçün bir sıra standartlar tətbiq edilib, müalicə və müayinə nəticəsində əldə olunan məlumatların analizi, həmin nəticələrdən keyfiyyətin yaxşılaşdırılmasında istifadə ilə bağlı yeniliklər tətbiq edilib, pasiyentlərin sağlamlıq qeydlərinə əlçatanlığı genişləndirilib.
Rəqəmsal yeniliklərin tətbiqi ilə xidmət keyfiyyətinin yüksəldilməsi, pasiyent təhlükəsizliyinin təmin olunması, tibbi personalın təcrübəsinin genişləndirilməsi, pasiyentlərin müalicə prosesinə daxil edilməsi və digər istiqamətlər üzrə müsbət nəticələr əldə olunub, Azərbaycan səhiyyəsinin beynəlxalq aləmdə tanınması istiqamətində uğurlu addımlar atılıb.
Qeyd edək ki, HIMSS 1961-ci ildə təsis edilib. Təşkilatın fəaliyyət istiqamətlərindən biri də cəmiyyətə məxsus 7 mərhələli yetkinlik modulları üzrə standartları tətbiq etmiş tibb müəssisələrinə beynəlxalq sertifikatların təqdim olunmasıdır. Bu beynəlxalq sertifikatlar informasiya texnologiyaları və idarəetmə sistemlərindən effektiv istifadə etməklə səhiyyə xidmətinin keyfiyyətli, təhlükəsiz və səmərəli formada daim təkmilləşdirilməsinə görə təqdim olunur.
Xatırladaq ki, Azərbaycanda və regionda ilk dəfə HIMSS beynəlxalq akkreditasiya sertifikatını Yeni Klinika əldə edib. Nizami Tibb Mərkəzi isə sözügedən sertifikatı əldə edən ikinci tibb müəssisəsidir.
Bölmənin digər xəbərləri
