Novxanıda Gürcüstanın turizm imkanlarından söz açılmışdır
Bakı, 17 iyun (AZƏRTAC). İyunun 17-də Gürcüstanın Azərbaycandakı səfirliyinin təşkilatçılığı ilə Novxanıdakı “AF Hotel-Aqua Park” ailəvi əyləncə kompleksində bu ölkənin turizm imkanlarının təqdimatı ilə bağlı tədbir keçirilmişdir.
AZƏRTAC xəbər verir ki, Gürcüstanın Azərbaycandakı səfirliyi əməkdaşlarının, ictimaiyyət nümayəndələrinin və KİV təmsilçilərinin iştirak etdiyi tədbirdə milli turizm agentliyinin rəhbəri Maya Sidamonidze bildirmişdir ki, Azərbaycanda Gürcüstan Günləri çərçivəsində müxtəlif tədbirlər keçirilməsi nəzərdə tutulmuşdur. Bu tədbirlərdən biri bu gün təşkil olunur. İyunun 12-də Gürcüstanda turizm mövsümünə rəsmi start verilmişdir. Bununla əlaqədar müxtəlif layihələr icra olunur. Bu layihələr çərçivəsində müxtəlif ölkələrdə Gürcüstanın turizm imkanları təqdim edilir. Azərbaycan turizm bazarı bizim üçün vacib olduğuna görə növbəti tədbir Azərbaycanda keçirilir. Azərbaycan turistlərinin Gürcüstana gəlməsi üçün bu cür tədbirləri müntəzəm təşkil etmək istəyirik. Turist marşrutlarının keyfiyyətini, habelə turist turlarından istifadə edən əcnəbi və yerli turistlərin səyahətlərini daha da yaxşılaşdırmağa imkan verən infrastrukturun inkişafı üzərində işləyirik. Bu il Gürcüstana turist axınının güclənəcəyi gözlənilir. Ötən il Gürcüstana gələn 2 milyon turistin 498 mini Azərbaycandan olmuşdur. Azərbaycan bu ilin ilk beş ayı ərzində Gürcüstana gedən turistlərin sayına görə ikinci yerdədir.
Azərbaycan Mədəniyyət və Turizm Nazirliyi turizm şöbəsi müdirinin müavini Mahir Qəhrəmanov iki ölkə arasında mədəniyyət, turizm sahələrindəki əlaqələrdən, xalqlarımızın dostluq və qardaşlığından bəhs etmişdir. Bildirmişdir ki, Azərbaycanda turizmin inkişafının regional səviyyədə formalaşması bir daha ölkədə turizm potensialının beynəlxalq turizm bazarına inteqrasiya olunduğunu sübut edir. Bu yalnız Gürcüstanla yox, həm də Rusiya, Türkiyə ilə əlaqələrin genişləndirilməsidir. Bu əlaqələrin inkişafı həmin ölkələrlə turizm sahəsində təcrübə mübadiləsinin genişləndirilməsinə kömək edir. Bu ölkələrlə regional mədəni turizm marşrutları yaradılır. Bu gün artıq Gürcüstanla “şərab yolu” layihəsi vardır. “Aleksandr Düma Qafqazda” beynəlxalq mədəni turizm layihəsi mövcuddur. Biz mədəni turizm marşrutlarında Gürcüstanla geniş əməkdaşlıq edirik. Eyni zamanda, ekoloji turizm və milli parklar sahəsində əməkdaşlığa üstünlük veririk. Gürcüstan Azərbaycanda, Azərbaycan isə Gürcüstanda keçirilən daxili turizm sərgilərində iştirak edirlər. Bu əməkdaşlıq dünyada baş verən turizm yeniliklərinin öyrənilməsində və regional əməkdaşlığa, dostluq, qardaşlıq ənənələrinin inkişafına öz töhfəsini verəcəkdir. Gürcüstan Azərbaycanı özü üçün gözəl bazar hesab edir.
Tədbirdə gürcü folkloru, müasir musiqisi səsləndirilmiş, gürcü şərabının dadına baxılmış, Gürcüstanın görməli yerlərinin əks olunduğu fotoşəkillərdən və rəsm əsərlərindən ibarət sərgi açılmış, ənənəvi suvenirlər nümayiş etdirilmişdir.
Tədbir konsert proqramı ilə davam etdirilmişdir.
######
 |
 |
Bölmənin digər xəbərləri
