Oğuzlular ağacəkmə aksiyalarında fəal iştirak edirlər
Oğuz, 28 noyabr (AZƏRTAC). Noyabrın 28-də Yeni Azərbaycan Partiyası Oğuz rayon təşkilatının təşəbbüsü ilə Oğuz şəhərində növbəti ağacəkmə aksiyası keçirilmişdir.
AZƏRTAC xəbər verir ki, budəfəki aksiyada əsasən gənclər iştirak etmişlər. Aksiya zamanı şəhərin müxtəlif ərazilərində bir neçə yüz çinar, şam və digər ağac növləri, gül kolları əkilmişdir.
Rayonda ağacəkmə aksiyası artıq bir neçə həftədir ki, davam edir. Oğuzlular ekoloji mühitin sağlamlaşdırılması məqsədi ilə keçirilən bu xeyirxah aksiyalarda fəallıq nümayiş etdirirlər.
Son iməciliklərdə avtomobil yollarının kənarında, parklarda, idarə və müəssisələrin həyətlərində 3 mindən artıq ağac əkilmişdir. Ağacəkmə aksiyalarında rayon meşə mühafizəsi və bərpası müəssisəsinin kollektivi də yaxından iştirak edir. Müəssisə tərəfindən payız meşə əkini dövründə 40 hektar sahədə yeni meşəliklərin salınması planlaşdırılır.
Ümumiyyətlə, payız mövsümündə rayon ərazisində 30 mindən artıq ağac və gül kollarının əkilməsi nəzərdə tutulur.
Bölmənin digər xəbərləri
