OLİMPİYA ÇEMPİONU NAMİQ ABDULLAYEV BÖYÜK İDMANLA VİDALAŞMIŞDIR
Bakı, 18 iyul (AZƏRTAC). İyulun 18-də ümummilli lider Heydər Əliyevin xatirəsinə həsr olunmuş güləş üzrə “Qızıl Qran-pri” turnirinin final mərhələsi çərçivəsində Olimpiya çempionu Namiq Abdullayevin böyük idmandan getməsi münasibətilə mərasim keçirilmişdir.
Mərasimdə çıxış edən Beynəlxalq Güləş Federasiyaları Assosiasiyasının (FİLA) prezidenti Rafael Martinetti Azərbaycanda idmanın inkişafına göstərilən dövlət qayğısından və son illər bu istiqamətdə görülən işlərdən danışmışdır. Azərbaycan idmançılarının beynəlxalq yarışlarda qazandığı uğurlara toxunan FİLA prezidenti bunu ölkədə gənclərin hərtərəfli inkişafı ilə bağlı görülən işlərlə əlaqələndirmişdir. R.Martinetti Namiq Abdullayevin böyük idmanda qazandığı uğurlardan danışmış və ona gələcək işlərində yeni-yeni müvəffəqiyyətlər arzulamışdır.
Digər çıxışlarda vurğulanmışdır ki, Namiq Abdullayev son 20 ildə yetişən güləşçilərimizin ən məşhurlarındandır. Uzun illər olimpiya yığmamızın kapitanı olan güləşçi daim öz qələbələri ilə idmansevərlərə sevinc bəxş etmişdir. Namiq Abdullayev güclü məktəb keçdiyini, yığmamızın lideri olduğunu Avropa və dünya çempionatlarında bir daha sübut etmişdir. 2000-ci ildə Sidneyə kapitan kimi yollanan Namiq Olimpiya oyunlarının açılışında apardığı bayrağa layiq olmuşdur. Olimpiya çempionu və digər məsul yarışların qalibi kimi Azərbaycanın idman tarixinə düşən Namiq Abdullayevin xidmətləri yüksək qiymətləndirilmişdir. O, müstəqil Azərbaycanın “Tərəqqi” medalı və “Şöhrət” ordeni ilə təltif olunmuşdur.
Namiq Abdullayev uğurlar qazanmasında ona göstərilən diqqət və qayğıya görə dövlətimizin başçısı, Milli Olimpiya Komitəsinin prezidenti İlham Əliyevə minnətdarlığını bildirmiş, gələcək illərdə gənc idmançıların yetişməsində təcrübəsini əsirgəməyəcəyini vurğulamışdır.
Sonra Azərbaycanın və ABŞ-ın sərbəst güləş üzrə yığmaları arasında dostluq görüşü keçirilmişdir. Görüşdə hər iki yığmanın ən güclü pəhləvanları iştirak etmişdir.
######
Bölmənin digər xəbərləri
