İQTİSADİYYAT
ÖLKƏNİN CƏNUB BÖLGƏLƏRİNİN ELEKTRİK TƏCHİZATI PROBLEMLƏRİ HƏLL OLUNMUŞDUR
“Azərenerji” Səhmdar Cəmiyyətinin mətbuat xidmətindən AZƏRTAC-a bildirmişlər ki, son üç gün ərzində hava şəraitinin kəskin şəkildə dəyişməsi respublikanın cənub bölgələrinin elektrik enerjisi ilə təchizatında problemlər yaratmışdır. Dekabrın 10-da güclü qar yağması nəticəsində Lerik və Yardımlı rayonlarını elektrik enerjisi ilə təmin edən 35 kilovoltluq elektrik ötürmə xətləri zədələnmişdir.
Ölkənin baş enerji idarəsi mütəxəssislərinin səyləri ilə Yardımlı rayonunda elektrik xəttində nasazlıq aradan qaldırılmışdır və hazırda optimal rejimdə işləyir. Hamarat elektrikötürmə xəttində isə bərpa işləri davam edir.
Hazırda Lerik və Yardımlı rayonlarına elektrik enerjisi Yardımlı elektrikötürmə xətti vasitəsilə verilir.
Yardımlı rayonunun elektrik enerjisinə tələbatı 4 meqavattdır. Hava şəraiti yaxşılaşmasa, tələbat daha da artacaqdır.
“Azərenerji” SC-nin müəssisələri lazımi həcmdə elektrik enerjisi hasilatını təmin etmək üçün bütün imkanları səfərbərliyə almışlar. Şirkətin mütəxəssisləri isə istehlakçıların ehtiyacını ödəmək üçün zəruri tədbirlər görürlər.