Ölkənin turizm imkanlarının təbliğinə məktəblilər də qoşulmuşlar
Gəncə, 30 mart (AZƏRTAC). “Turizm ili” ilə bağlı Gəncənin ümumtəhsil məktəblərində silsilə tədbirlərin həyata keçirilməsi nəzərdə tutulmuşdur.
Gəncə Şəhər Təhsil İdarəsinin metodika mərkəzinin müdiri Afaq Əliyevanın verdiyi məlumata görə, dövlətimizin başçısının 2011-ci ili “Turizm ili” elan etməsi məktəblilər arasında da ruh yüksəkliyi yaratmışdır. Bunu nəzərə alaraq metodiki mərkəzdə tədbirlər planı tərtib edilmişdir. Plana uyğun olaraq yaxın günlərdə şəhər məktəbliləri arasında “Azərbaycanım mənim” adlı inşa müsabiqəsi keçiriləcəkdir. Apreldə şagirdlərin milli-mənəvi dəyərlərimizi əks etdirən əl işlərindən ibarət sərgisi, daha sonra isə rəsm müsabiqəsi təşkil ediləcəkdir. Tədbirlər planında məktəblilərin kompyuter resurslarından istifadə etməklə hazırlayacaqları elektron təqdimatların nümayişi də nəzərdə tutulmuşdur.
Bölmənin digər xəbərləri
