Bakı, 19 fevral, AZƏRTAC 

Türkiyənin “29 Mayıs” Universitetində Xocalıda qətlə yetirilmiş 63 uşaqdan bəhs edən, 4 dildə nəşr olunan “Onlar heç vaxt böyüməyəcəklər” kitabının təqdimat mərasimi keçirilib.

Azərbaycan İlahiyyat İnstitutundan (Aİİ) AZƏRTAC-a bildirilib ki, kitab Ailə, Qadın və Uşaq Problemləri üzrə Dövlət Komitəsi, Aİİ və “Azərbaycan” Nəşriyyatının dəstəyilə çap olunub.

Azərbaycan İlahiyyat İnstitutu, “29 Mayıs” Universiteti, Türk Ocaqları İstanbul Şöbəsi və Erməni Təcavüzünün Tanıdılması İctimai Birliyinin birgə təşkilatçılığı ilə keçirilən tədbirdə öncə Xocalı soyqırımı qurbanlarının xatirəsi bir dəqiqəlik sükutla yad edilib, Azərbaycan və Türkiyə respublikalarının dövlət himnləri səsləndirilib.

Tədbirdə çıxış edən “29 Mayıs” Universitetinin rektoru Mustafa Sinanoğlu əvvəlcə Qarakənddə vertolyotun vurulmasından danışıb. Sonra Xocalı soyqırımından bəhs edən M.Sinanoğlu soyqırımında yüzlərlə günahsız insanın ermənilər tərəfindən amansızlıqla qətlə yetirildiyini xatırladıb. Qeyd edib ki, Ermənistanın hərbi-siyasi təcavüzü dünya ictimaiyyəti tərəfindən ittiham edilməli, beynəlxalq təşkilatlar, dünya dövlətləri Ermənistan tərəfindən Azərbaycan torpaqlarında törədilmiş hərbi cinayətə - Xocalı soyqırımına beynəlxalq siyasi-hüquqi qiymət verməlidirlər.

Türk Ocaqları İstanbul Şöbəsinin müdiri Cezmi Bayram Xocalı soyqırımını ermənilərin tarixboyu törətdikləri ən böyük vəhşilik kimi dəyərləndirib. Bildirib ki, həmin gecə Xocalıda yaşayan yerli əhali vəhşicəsinə qətlə yetirilib. Cezmi Bayram bu qanlı hadisənin dünya miqyasında tanıdılması istiqamətində tələbələrin və sosial medianın rolunun vacibliyini vurğulayıb.

Aİİ-nin Elm və innovasiyalar üzrə prorektoru Aqil Şirinov erməni vəhşiliklərini tarixi nöqteyi-nəzərdən təhlil edib. Bildirib ki, tarixboyu ermənilər türk-müsəlman əhalisinə qarşı düşmən münasibətində olublar. Xocalıda baş vermiş qətliam təsadüf deyil, məhz bilərəkdən və düşünülmüş şəkildə həyata keçirilib. “Soyqırımı” sözünün mənasını açıqlayan prorektor bildirib ki, bu prosesin hər hansı ölkənin hökuməti tərəfindən həyata keçirilməsi əsas şərt olaraq qəbul edilir. Soyqırımın beynəlxalq səviyyədə qəbul edilmiş tərifi onu deməyə əsas verir ki, Xocalı hadisələri Azərbaycan xalqına qarşı törədilən soyqırımı aktıdır. Dünyada qəbul olunan beynəlxalq konvensiyalar və qanunlar Xocalı faciəsi kimi soyqırımları pisləyir, belə hadisələrin yolverilməz olduğunu bildirir.

“29 Mayıs” Universitetinin Himayəçilər Şurasının sədri Təyyar Altıkulaç bildirib ki, ötən əsrin sonunda baş verən bu faciə təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Bu faciə heç vaxt unudulmamalı, cinayət cəzasız qalmamalıdır.

T.Altıkulaç daha sonra 1992-ci il Azərbaycanı ilə bugünkü Azərbaycanın qaranlıq və işıq qədər bir-birindən fərqləndiyini bildirib.

“Erməni təcavüzünün tanıdılması” İctimai Birliyinin sədri, Qarabağ veteranı, jurnalist Səriyyə Cəfərova məlumat verib ki, faciənin ictimaiyyətə çatdırılması, sosial və siyasi aspektinin mahiyyətinin gənclərə çatdırılması məqsədilə Xocalıda qətlə yetirilmiş 63 uşaqdan bəhs edən “Onlar heç vaxt böyüməyəcəklər” kitabı 4 dildə nəşr edilib.

“Xocalını, Xocalılı günlərimi heç vaxt unutmuram. İlk dəfə əlimə qələm alıb qəzetçilik edəndən bu günədək Xocalıdan, onun başına gətirilən müsibətlərdən, böyüklü-kiçikli şəhid olmuş günahsız insanlardan, igid oğul və qızlardan yazıram. Gücüm çatdıqca, əlim yetdikcə, bu qətliamı dünyaya tanıtmaq üçün çalışıram”, - deyə Səriyyə Cəfərova qeyd edib.

Tədbirdə “Xocalı zülmət bir gecə” sənədli filmi də nümayiş olunub. Filmdə Xocalı soyqırımının canlı şahidləri həmin gündən danışırlar.