ORDU
“Optika-Mexanika” İstehsalat Birliyi ilə “ASELSAN” şirkəti arasında əməkdaşlıq haqqında memorandum imzalanacaq
Bakı, 12 sentyabr (AZƏRTAC). Müdafiə sənayesi naziri Yavər Camalov birinci Azərbaycan Beynəlxalq müdafiə sənayesi “ADEX-2014” sərgisi çərçivəsində Türkiyənin “ASELSAN” şirkətinin idarə heyətinin sədri Hasan Canpolatın rəhbərlik etdiyi geniş tərkibli nümayəndə heyəti ilə görüşüb.
Müdafiə Sənayesi Nazirliyindən AZƏRTAC-a bildiriblər ki, görüşdə nazirlik ilə “ASELSAN” şirkəti arasında mövcud olan əməkdaşlığın perspektivləri və qarşılıqlı maraq doğuran digər məsələlər müzakirə edilib.
Görüşün sonunda Müdafiə Sənayesi Nazirliyinin “Optika-Mexanika” İstehsalat Birliyi ilə “ASELSAN” şirkəti arasında qarşılıqlı əməkdaşlıq haqqında memorandum imzalanmasına dair razılıq əldə olunub.