Orxan Həsənoğlu: Yekaterinburqda yaşananlar Azərbaycanın dostları tərəfindən hiddətlə qarşılanıb
Ankara, 30 iyun, AZƏRTAC
Rusiya Federasiyasının Yekaterinburq şəhərində azərbaycanlıların məruz qaldıqları qeyri-insani hərəkətlər həmin soydaşlarımızın milli mənsubiyyətinə qarşı yönəlmiş irqçi və faşist hücumdur. Bu vəhşilik Şimali Kipr Türk Cümhuriyyətində, eyni zamanda, Azərbaycanın və ümumilikdə Türk dünyasının dostları tərəfindən dərin hiddət və narahatlıqla qarşılanıb.
Bu fikirləri AZƏRTAC-a açıqlamasında Azərbaycan-Kipr Dostluq Cəmiyyətinin sədri Orxan Həsənoğlu səsləndirib.
“Biz bu hadisəni yalnız fərdi zorakılıq halı kimi yox, Rusiyada getdikcə artan antitürk, anti-Azərbaycan ritorikasının və dövlət strukturlarında yer alan irqçi zehniyyətin təzahürü kimi qiymətləndiririk. Zorakılığın dövlətdən qaynaqlanması isə vəziyyəti daha da ağırlaşdırır. Azərbaycan-Kipr Dostluq Cəmiyyəti olaraq bildiririk ki, bu cür qeyri-insani davranışlar qarşısında susmaq mümkün deyil. Azərbaycan dövləti və xalqı bu ədalətsizliyin qarşısında yalnız deyil. Biz də Azərbaycan xalqının və dövlətinin yanında olduğumuzu qəti şəkildə bəyan edirik”, - deyə o bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
