ÖZBƏKİSTAN PREZİDENTİ TƏHLÜKƏSİZLİK ŞURASININ KATİBLƏRİNİ QƏBUL ETMİŞDİR

07.06.2004 [16:16]
Çap et
A⁺ A^-

AZƏRTAC-ın xüsusi müxbiri xəbər verir ki, Şanxay Əməkdaşlıq Təşkilatı (ŞƏT) Təhlükəsizlik Şurası katiblərinin görüşü başa çatdıqdan sonra Özbəkistan Prezidenti İslam Kərimov Rusiya, Qazaxıstan və Tacikistan təhlükəsizlik şuralarının katibləri İqor İvanov, Bulat Utemuratov, Əmirqul Əzimov, Qırğızıstan Təhlükəsizlik Şurası katibinin müavini Mukambek Kasıməliyev və Çin Xalq Respublikası ictimai təhlükəsizlik nazirinin müavini Yan Xuanı qəbul etmişdir.

Özbəkistan Prezidenti İ.Kərimov qeyd etmişdir ki, bu görüş təhlükəsizlik məsələləri ilə bağlı müxtəlif baxışları və münasibətləri əlaqələndirməyə imkan vermiş, tərəflərin ümumi maraqlar uğrunda mübarizə apardığını bir daha təsdiq etmişdir.

Qeyd edilmişdir ki, Şanxay Əməkdaşlıq Təşkilatı çərçivəsində təhlükəsizliyin möhkəmləndirilməsi əməkdaşlığın əsas istiqamətlərindən biridir. Bu baxımdan ŞƏT dövlət başçılarının sammiti ərəfəsində məsul nümayəndələrin görüşü mühüm hadisə hesab edilə bilər.

Görüş zamanı sammitə hazırlıq və regional təhlükəsizlik məsələləri ətrafında fikir mübadiləsi aparılmışdır.