MƏDƏNİYYƏT
Özbəkistanda Ümummilli Lider Heydər Əliyevə həsr olunmuş konsert təşkil olunub VİDEO
Bakı, 14 may, AZƏRTAC
Azərbaycanın Özbəkistandakı səfirliyi, Milli Qəhrəman Çingiz Mustafayev adına Fond və Özbəkistandakı Heydər Əliyev adına Azərbaycan Mədəniyyət Mərkəzi ilə birgə Özbəkistan Dövlət Konservatoriyasında Ümummilli Lider Heydər Əliyevə həsr olunmuş konsert təşkil edib.
Mədəniyyət Mərkəzindən AZƏRTAC-a bildirilib ki, əvvəlcə iştirakçılar Ulu Öndər Heydər Əliyevin həyat yolu və çoxşaxəli fəaliyyəti ilə bağlı fotoşəkillərdən ibarət sərgi ilə tanış olublar.
Azərbaycanın Özbəkistandakı səfiri Hüseyn Quliyev çıxışında dünyaşöhrətli siyasətçi, görkəmli dövlət xadimi Heydər Əliyevin həm Azərbaycanda, həm də keçmiş SSRİ-də yüksək vəzifələr tutduğu dövrdəki fəaliyyətindən geniş söhbət açıb. Səfir Ulu Öndərin Azərbaycanın rəhbərliyinə gəlməsini ölkəmizin taleyində ən uğurlu hadisə kimi qeyd edib. Diplomat vurğulayıb ki, Ümummilli Liderin apardığı daxili və xarici siyasət bu gün də Azərbaycan Prezidenti İlham Əliyev tərəfindən uğurla davam etdirilir.
H.Quliyev bildirib ki, tarixçi alim, Azərbaycan həqiqətləri ilə bağlı kitabların müəllifi Şuxrat Barlas, eləcə də alim və tərcüməçi Babaxan Şərif Azərbaycan mədəniyyəti, tarixi, ədəbiyyatı sahələrindəki xidmətlərə görə Azərbaycan Respublikasının Prezidenti İlham Əliyev tərəfindən “Heydər Əliyevin 100 illiyi (1923–2023)” yubiley medalı ilə təltif ediliblər. Sonra səfir medalları sahiblərinə təqdim edib.
Azərbaycanın Milli Qəhrəmanı Çingiz Mustafayev Fondunun rəhbəri Vahid Mustafayev Heydər Əliyevin Azərbaycan dövlətçiliyinin möhkəmləndirilməsi, milli-mənəvi dəyərlərin qorunub saxlanması, azərbaycançılıq ideologiyasının bərqərar olması, ölkənin iqtisadi inkişafı sahəsindəki xidmətləri haqqında söhbət açıb, Ulu Öndərlə olan görüşlərini yada salıb.
Özbəkistan-Azərbaycan Dostluq Cəmiyyətinin icraçı direktoru, professor Erkin Nuriddinov qeyd edib ki, Ulu Öndər Heydər Əliyev hər zaman Özbəkistanla münasibətlərə xüsusi önəm verib.
Tədbirin bədii hissəsində beynəlxalq müsabiqələr laureatı, Rikardo Vines adına müsabiqənin mütləq qalibi, “Monte Karlo Piano Masters” piano müsabiqəsinin Qran-Pri qalibi Nikolay Kuznetsov tərəfindən tamaşaçılara fortepianoda klassik musiqilərdən ibarət konsert təqdim olunub.
Qonaqlara Azərbaycanın Xalq yazıçısı Elmira Axundovanın özbək dilində çap olunan “Zərifə və Heydər Əliyevlər – Əbədiyaşar məhəbbət” adlı kitabı hədiyyə edilib.