Özbəkistanın Buxara şəhərində “Azərbaycan mədəniyyəti və ədəbiyyatı günləri”nin rəsmi açılış mərasimi olub VİDEO
Bakı, 21 oktyabr, AZƏRTAC
Özbəkistanda "Azərbaycan mədəniyyəti və ədəbiyyatı günləri" çərçivəsində bu ölkədəki Heydər Əliyev adına Azərbaycan Mədəniyyət Mərkəzinin təşkilatçılığı, iki ölkənin Mədəniyyət nazirlikləri, Azərbaycan Milli Məclisinin Mədəniyyət komitəsi və Azərbaycanın Özbəkistandakı səfirliyinin dəstəyi ilə reallaşan tədbirlər paytaxtla yanaşı, Buxara, Nəvai və Səmərqənd vilayətlərini də əhatə edir.
Özbəkistandakı Heydər Əliyev adına Mədəniyyət Mərkəzindən AZƏRTAC-a verilən məlumata görə, Buxara səhərinin "Yoshlar markazi"ndə keçirilən tədbirdə Azərbaycandan gələn qonaqlar, yerli hakimiyyət, mədəniyyət və sənət xadimləri, yerli azərbaycanlılar, universitet tələbələri, jurnalistlər iştirak ediblər.
Buxara şəhər hakimi Jamol Nasirov Azərbaycandan gələn qonaqlara təşəkkür edərək, şəhərdə ilk dəfə olaraq keçirilən “Azərbaycan mədəniyyəti və ədəbiyyatı günləri”nin iki ölkə arasında dostluq, mədəni-ədəbi əlaqələrinin daha da möhkəmlənməsinə xidmət edəcəyinə inamını ifadə edib.
Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov öz çıxışında dövlətlərimiz arasında yüksək səviyyəli münasibətlər haqqında danışaraq, dövlət başçılarımızın uğurlu siyasəti nəticəsində bu əlaqələrin strateji müttəfiqlik səviyyəsinə yüksəldiyini qeyd edib.
Diplomat mədəni əlaqələr haqqında məlumat verərək, keçirilən “Azərbaycan mədəniyyəti və ədəbiyyatı günləri” çərçivəsində Buxara vilayət sakinlərinə milli mədəniyyətimiz, musiqimiz, rəqs, rəsm sənətimiz, musiqi alətləri, milli libaslarımızın təqdim ediləcəyini, kitabxanalara və yerli diaspor təşkilatına Azərbaycana dair xeyli nəşrlərin hədiyyə olunacağını bildirib. O, bu ilin Azərbaycan Respublikası Prezidenti İlham Əliyev tərəfindən "Şuşa İli" elan olunduğu haqqında və bu istiqamətdə Özbəkistanda keçirilən tədbirlər və layihələr barədə danışıb.
Azərbaycan Respublikası Milli Məclisinin Mədəniyyət komitəsinin rəhbəri Qənirə xanım Paşayeva Azərbaycanla Özbəkistan arasında bütün sahələrdə əlaqələrin durmadan inkişaf etdiyini bildirib. O, xalqlarımızın dost, qardaş olduğunu vurğulayaraq, belə tədbirlərin daimi keçirilməsinin vacibliyini diqqətə çatdırıb. Qənirə Paşayeva türk dünyası arasında həmrəylik haqqında danışaraq Azərbaycanın Qarabağdakı Zəfəri və Vətən müharibəsində türk ölkələrinin haqq işimizə dəstək göstərdiklərini minnətdarlıqla xatırlayıb.
Tədbir möhtəşəm konsert proqramı ilə davam edib. Azərbaycanın və Özbəkistanın Xalq artisti Gülyanaq Məmmədova və Səmərqənddə keçirilən “Şərq təranələri” beynəlxalq musiqi festivalının “Qran-pri” mükafatçısı, tarzən Sahib Paşazadə milli musiqilərimizi ifa ediblər.
Konsert proqramında Özbəkistandakı Heydər Əliyev adına Azərbaycan Mədəniyyət Mərkəzinin nəzdindəki "Kaykeb Aliyeva adına Azərbaycan qızları" rəqs ansamblı milli rəqslərimizi ifa edib.
Tədbirdə Azərbaycan və Özbəkistan milli naxışları, koloritlərini özündə əks etdirən milli libaslar kolleksiyası nümayiş etdirilib. Geyimlər azərbaycanlı modelyer-dizayner Afaq İsmayılzadə tərəfindən hazırlanıb.
Bölmənin digər xəbərləri
